شوبز انڈسٹری دی ترقی لئی چنگے ادکاراں دی ضرورت: فیصل قریشی……٭رویل خبر٭

کراچی (نمایندا رویل) پاکستان دے مقبول اداکار فیصل قریشی نے انڈسٹری وچ رنگت تے انسٹا گرام فالوورز دی بنیاد اُتے اداکاراں نُوں منتخب کرن دے طریقا کار اُتے برہمی دا اظہار کیتا اے۔ اداکار فیصل قریشی حال ای وچ اِک نجی ویب چینل دے شو وچ جلوا گر ہوئے تے شو دوران فیصل قریشی نے مجمان دے سوالاں دا جواب دیندیاں ہویاں مختلف موضوعات اُتے گلبات کیتی۔ فیصل قریشی دا کہناسی کہ سانوں پاکستان شوبز انڈسٹری نُوں پروان چڑھان لئی چنگے اداکاراں دی ضرورت اے‘ میں بہت ساریاں تھاواں اُتے بہت سارے اداکاراں دے نخرے ویکھدا آں صرف ایس لئی کہ ایہناں اداکاراں دے کئی ملین فالورز نیں پر ایہدا مطلب ایہ نہیں کہ باقی سارے اداکار بے کار نیں۔انڈسٹری وچ چہریاں‘ رنگ تے انسٹا گرام فالوورز نُوں ویکھ کے کاسٹ کیتے جان ولے اداکاراں نُوں ویکھ کے تکلیف ہوندی اے۔فیصل قریشی دا کہنا سی کہ ’میں ایہ کہنا چاہواں گا کہ جہڑے چنگے اداکار نیں اوہ اصل وچ ضایع ہو رہے نیں۔