مریم نواز تے جمائما گولڈ سمتھ وچ لفظی گولا باری، ایس سبھ دے ذمے دار تہاڈے پچھلے گھروالے نیں: مریم نواز شریف……٭رویل خبر٭

لاہور (نیوز ڈیسک) مریم نواز شریف تے وزیراعظم عمران خان دی پچھلی گھروالی جمائما گولڈ سمتھ سوشل میڈیا اُتے آہمو ساہمنے آ گئے۔ جمائما نے اِک اخبار دا اداریا ٹویٹر اُتے شیئر کیتا جہدے وچ عمران خان تے مریم نواز نُوں کہیا گیا سی کہ اپنے بالاں تے یہود مخالف رویے نُوں سیاست وچ نہ گھسیٹو۔ نال ای جمائما نے تبصرا کیتا کہ مریم نواز کہندے نیں کہ میرے بال یہودیاں دی گود وچ وڈے ہو رہے نیں‘ اِک دہاکے تک میڈیا تے سیاستداناں ولوں کیتے جان والے یہود مخالف حملیاں‘ ہر ہفتے قتل دیاں دھمکیاں تے میرے گھر دے باہر احتجاجی مظاہریاں دے بعد میں 2004 وچ پاکستان چھڈ دِتا سی۔ پر ایہ سلسلا اج وی جاری اے۔ ایہدے اُتے مسلم لیگ ن دی نائب صدر مریم نواز نے جمائما نُوں جواب دیندیاں ہویاں کہیا کہ مینوں تہاڈے‘ تہاڈے پُتراں یاں تہاڈی ذاتی زندگی وچ بلکل کوئی دلچسپی نہیں‘ کیوں جے میر یکول کرن تے کہن لئی بہتر کم نیں۔ مریم نواز نے کہیا کہ پر جے تہاڈے پچھلے خاوند دشمنی وچ دوجیاں دے گھر والیاں نُوں گھسیٹدے نیں تے دوجیاں دے کول وی کہن لئی نامناسب گلاں موجود نیں‘ ایس لئی تُسیں صرف اپنے پچھلے گھروالے نُوں ای موردا الزام ٹھہراؤ۔