کشمیریاں دا جوش شیر دی فتح دی خُش خبری اے: قائد حزب اختلاف میاں شہباز شریف ……٭رویل خبر٭

لاہور (نمایندا رویل) مسلم لیگ ن دے صدر تے قومی اسمبلی وچ قائد حزب اختلاف میاں شہباز شریف نے کہیا اے کہ ازاد کشمیر دا الیکشن باشعور کشمیریاں دے نواز شریف دی قیادت اُتے اعتما د دا تواریخی فیصلا ہوو یگا‘ کشمیریاں دا جوش شیر دی فتح دی نوید اے۔ اپنے اِک بیان وچ مسلم لیگ ن دے صدر تے قومی اسمبلی وچ قائدِ حزب اختلاف میاں شہباز شریف نے کہیا کہ ازاد کشمیر دی لوکائی لئی تعمیر‘ ترقی‘ خشحالی لئی اِک نویں دور دا اغاز کراں گے۔ اوہناں نے کہیا اے کہ ازاد کشمیر وچ موٹرویز‘ تعلیم‘ صحت تے لوکائی دی ترقی دے مثالی منصوبے لیاوں ا گے۔ اوہناں نے کہیا کہ اللہ تعالیٰ دے کرم نال مسلم لیگ ن دے نال کشمیر دی لوکائی نے تواریخی محبت دا اظہار کیتا اے۔ اوہناں نے کہیا کہ کامیاب الیکشن مہم اُتے سارے آگوواں‘ کارکناں تے لوکائی نُوں خراجِ تحسین پیش کردا آں۔ اوہناں نے کہیا اے کہ ازاد جموں تے کشمیر دی لوکائی باشعور تے اہلِ بصیرت نیں‘ جہڑے اپنے ووٹ دی طاقت نال اپنے حقاں دی حفاظت کرن گے۔ اوہناں نے کہیا کہ پاکستان دی لوکائی نُوں مایوس تے مجبور کرن والے ازاد کشمیر دی لوکائی نُوں کجھ نہیں دے سکدے۔ اوہناں نے دعوا کیتا کہ جویں پنجاب سنے پور ملک نُوں ترقی دِتی‘ ایسے طرحاں ازاد کشمیر دی لوکائی نُوں اوہناں دا حصّا دواں گے۔ شہباز شریف نے کہیا کہ ازاد کشمیر دی لوکائی دا ولولا‘ کارکناں دا جذبا تے ووٹرز دا جوش شیر دی فتح دی نوید اے۔ اوہناں نے کہیا کہ وڈے پیمانے اُتے مسلم لیگ ن دے جلسیاں وچ رلت اُتے لوکائی دا شکریا ادا کردا آں۔ اوہناں نے کہیا کہ ازاد کشمیر تے جموں تے کشمیر دی لوکائی الیکشن ڈے اُتے گھراں توں نکلے تے شیر اُتے مہر لاوے۔ اوہناں نے ہور کہیا کہ کشمیری 3 سال وچ پاکستان تے 8 سال وچ خیبر دی لوکائی نُوں ستان والیاں چلدا کرن۔ اوہناں نے ایہ وی کہیا کہ شیر نُوں ووٹ دین دا مطلب‘ مقبوضا کشمیر تے تہاڈے حقاں دا یقینی تحفظ تے ترقی دی ضمانت اے۔