لوکائی عمران خان دی تبدیلی نُوں پچھان چُکی‘ ازاد کشمیر دی کٹھ پتلی حکومت نُوں ٹف ٹائم دواں گے: بلاول بھٹو زرداری……٭رویل خبر٭

اسلام آباد (نیوز ڈیسک) پاکستان پیپلز پارٹی (پی پی پی) دے چیئرمین بلاول بھٹو زرداری دا کہنا اے کہ پاکستان دی لوکائی عمران خان دی تبدیلی نُوں پچھان چُکی اے‘ سندھ دی لوکائی وی جاندی اے‘ وزیراعظم کہندا اے سندھ نُوں فتح کرے گا‘ ایہناں نُوں کراچی توں عبرتناک شکست ہوئی‘ عمران خان سندھ دے سیاسی یتیماں نُوں ساڈے خلاف اکٹھا کر رہے‘ ایہناں نُوں شکست دواں گے۔ وفاقی راجدھانی وچ میڈیا نال گلبات کردیاں ہویاں پی پی چیئرمین دا کہنا سی کہ ازاد کشمیر وچ پیپلز پارٹی دے جتن والے امیدواراں نُوں مبارکباد پیش کردا آں‘ ازاد کشمیر دی کٹھ پتلی حکومت نُوں ٹف ٹائم دواں گے۔ باقی جماعتاں نال وی رابطا کراں گے۔ اپنی گل نُوں جاری رکھدیاں ہویاں اوہناں نے کہیا کہ وفاقی حکومت نے کشمیر دی لوکائی دے مینڈیٹ اُتے ڈا کا ماریا اے‘ پیسے‘ تشدد دی بنیاد اُتے حکومت بنان جا رہے آں‘ آزاد کشمیر الیکشن وچ دھاندلی نُوں تھاں‘ تھاں ایکسپوز کراں گے۔ پیپلز پارٹی دی فتح دا سلسلا جاری رہوے گا۔ بلاول بھٹو دا کہنا سی کہ پاکستان دی لوکائی عمران خان دی تبدیلی نُو ں پچھان چُکی اے‘ سندھ دی لوکائی وی جاندی اے‘ وزیراعظم نے پانی‘ گیس‘ آدم شماری‘ روزگار اُتے ڈاکا ماریا‘ عمران خان کہندا اے سندھ نُوں فتح کرے گا‘ ایہناں نُوں کراچی توں عبرتناک شکست ہوئی۔ پی پی چیئرمین دا کہنا سی کہ عدم اعتماد لیا کے اسیں وزیر اعلا پنجاب سردار عثمان بزدار سرکار نُوں ڈِگا سکدے آں‘ جے لوڑ پئی تے شہباز شریف نال وی رابطا کراں گے۔ پیپلز پارٹی نُوں اپنی منزل دا پتا اے‘ ساڈی پوزیشن واضح اے‘ اپوزیشن نُوں متحد ہون دی ضرورت اے‘ امید کردے آں باقی جماعتاں وچ وی کلیریٹی ہووے گی۔ اوہناں دا کہنا سی کہ الیکٹرانک ووٹنگ مشین تجویز بدنیتی اُتے مبنی اے‘ جے ایہ الیکشن ریفارمز چاہندے نیں تے اتفاق رائے پیدا کرنا ہووے گا۔ آرڈیننس زبردستی پاس کروایا گیا‘ جدوں تک الیکشن کمیشن الیکٹرانک مشین نُوں نہیں مندا اسیں کویں اہمیت دے سکدے آں۔ اوہناں نے کہیا کہ آزاد کشمیر وچ جیالیاں دے خلاف مقدمے نویں گل نہیں‘ آمراں دا مقابلا کیتا‘ کٹھ پتلی دا وی کراں گے‘ صرف دھاندلی‘ دھاندلی دا الزام لانا کافی نہیں‘ حکومت دا پچھا کرنا پوے گا۔ جے اپوزیشن نال نہیں چلے گی تے پیپلز پارٹی کلیا وی اپوزیشن کرن نُوں تیار اے۔