دیس پیار دی شاعری

دیس میرے دے واسی وسن چپا چپا جیوے

رب کرئے کہ رُکھاں اتلا پتا پتا جیوے

چاندی رنگی کھڑی کپاہ دا تونبا تونبا جیوے

باغاں دے وچ کھڑے حیاتی بوٹا بوٹا جیوے

ویکھ لویں توں ایہناں اک دن مل پانا اے سرگھی دا

اکھیاں وچ جو ستا ہویا تارا تارا جیوے

ساڈے سر تے کھڑ کھڑ ہسن بدلاں دے کجھ ٹوٹے

ساڈے پیریں وچھ وچھ جاندا ٹپا ٹپا جیوے

ورھدے مینہہ وچ بھجدیاں جاون ون سونیاں فصلاں

ساوے ساوے کھیتاں وچلا بنا بنا جیوے

جیہناں نویاں نسلاں دے لئی اپنے سکھ تیاگے

اوہناں دے مڑھکے دا ڈلھیا چویا چویا جیوے

جہڑیاں غزلاں کہیاں نہیں میں اوہناں دی وی خیر

دل دے کورے کاغذ اُتلا مصرعا مصرعا جیوے

*****