موچی ۔۔۔۔۔۔٭رویل کہانی٭

موچی دا ہتھ اوہنوں دس دیندا — جنور کویں مریا تے اوہدی عمر کنی سی ۔ اوہدے پوٹے چم نال گلاں کردے ۔ چم وی اوہنوں اوہ گلاں دس دیندا جہڑیاں چمار لکائی پھردے سن ۔ ورھیاں مگروں اوہدے ہتھ اوہ کھل وی پھڑدے جہڑی کسے جنور دی پیڑھی دا اخیرلا سرا ہوندی ۔ موچی کلبوت نال چم نوں نویں حیاتی دیندا تے جنور انج ای بھجن لگ پیندے جویں جیوندے بھجدے سن ۔ بس اندروں خالی ہون نال شکل بدل جاندی ۔ مجھاں تے کھوتیاں دیاں کھلاں ای سن جہناں پوری حیاتی ہنڈھی تے اپنی موت آپ مرے ۔ باقی کھلاں اچوں رَت وگدی -

موچی نوں اپنے کم دی قدر اوس دن ودھیری لگی جدوں اک سیانے اوہنوں ایہ دسیا

" جیوندے بندیاں دی کہانی جتیاں دی کہانی اے ، کجھ مارن آلے نیں ، کجھ کھان آلے "

ویلا پھریا تے نویاں مشیناں آون نال موچی دا کم گھٹن نال قدر وی گھٹ گئی ۔ انج وی اوہدا دل ہون جتیاں سین نوں نہ کردا ۔ اوہنوں انج لگدا جویں اپنے نکے بالاں دی کھل نوں تروپے لاندا ہووے ۔ اک دن اوس اپنی ہٹی بند کر دتی کیوں جے اوہدے ہتھ دے پوٹیاں دس دتا سی

"کھلاں کُولے تے ملوک گوشت آلے جماندرو جنوراں دیاں نیں"-

٭٭٭٭٭