زندگی بہت عارضی‘ آخرت دا سوچنا چاہید ااے: عارف لوہار ……٭رویل خبر٭

لاہور (نمایندا رویل) نامور گلوکار عارف لوہار نے کہیا اے کہ زندگی پانی دا بلبلا اے ایس لئی سانوں اپنی آخرت لئی وی سوچ وچار کرنی چاہیدی اے‘ کمزور رشتے داراں تے غریباں دا حق مارنا تے اوہناں دیاں جائیداداں اُتے قبضے کرنا کوئی فخر جوگ کم نہیں سگوں ایہدا حساب دینا پوے گا تے میرے رب دی گرفت بہت سخت اے۔ اِک انٹرویو وچ عارف لوہار نے کہیا کہ زندگی بہت عارضی اے ایس لئی میں کدی وی بہت لمی منصوبا بندی نہیں کیتی‘ زندگی لنگھان لئی جنا ضروری ہوندا اے اونی سوچ وچار کردا آں تے رب دی ذات ساڈے حق وچ بہتر کردی اے۔ اوہناں نے کہیا کہ با اثر لوک کمزور طبقیاں اُتے ظلم کر کے بڑے فخر نال ویڈیوز سوشل میڈیا اُتے سیئر کردے نیں پر ایہو جہے لوک رب دی گرفت توں بچ نہیں سکدے۔