سوانیاں خلاف جرم روکن لئی قانون وچ سقم موجود اے: صوفیہ احمد……٭رویل خبر٭

لاہور(نمایندا رویل)نامور اداکارا صوفیہ احمدنے کہیا اے کہ پاکستان وچ سوانیاں نُوں ہراساں تے جنسی زیادتی دا نشانا بنان دے پے درپے واقعات انتہائی تشویش دا کارن نیں‘ حکومت فورن قومی اسمبلی دا اجلاس سَد کے ہنگامی بنیاداں اُتے مؤثر قانون سازی کرے۔ اپنے اِک بیان وچ اداکارا نے کہیا کہ حالے صرف اوہ واقعات ساہمنے آندے نیں جہڑے سوانیاں ہمت کر کے پولیس دے ساہمنے لے آندیاں نیں ہور پتا نہیں ایہو جہے سینکڑے‘ ہزاراں واقعات نیں جہناں دا سوانیاں اپنے نال خاندان تے معاشرے ولوں ناروا سلوک دا سوچدیاں ہویاں کسے نال ذکر نہیں کردیاں تے ایہ ظلم اپنے اُتے سَہ جاندیاں نیں۔ اوہناں نے کہیا کہ سوانیاں دے خلاف جرماں دی روک تھام لئی بنائے گئے قوانین وچ سقم موجود اے نہیں تے انج نہ ہوندا کہ اِک دنرا جہڑا 3 ورھیاں وچ 2 سوانیاں نال زیادتی دے جرم وچ جیل جاوے تے فیر ناقص تفتیش تے مدعی پارٹی دی غربت دی وجھا توں دُبارا باہر آ جاوے تے سفر کرن والی ماں دھی نُوں درندگی دا نشانا بنا سُٹے۔