کرونا وائرس نال 24 گھنٹیاں دے دوران ہور 91 بندے چلانا کر گئے ……٭رویل خبر٭

اسلام آباد (نیوز ڈیسک) پورے ملک وچ کرونا وائرس نال 24 گھنٹیاں دے دوران ہور 91 بندے چلانا کر گئے۔ نیشنل کمانڈ اینڈ اپریشن سینٹر ولوں جاری بیان دے مطابق پچھلے 24 گھنٹیاں دے دوران ملک وچ کرونا دی تشخیص لئی 59 ہزار 943 ٹیسٹ کیتے گئے جہناں وِچوں 4075 بندیاں وچ کرونا وائرس دی تصدیق ہوئی۔ پچھلے دن ایس وباء نے ہور 91 بندیاں دیاں زندگیاں نُوں نگل لیا۔ جد کہ مثبت کیساں دی شرح 6.79 فیصد ریکارڈ ہوئی اے۔ وفاقی وزیر منصوبا بندی تے نیشنل کمانڈ اینڈ اپریشن سینٹر (این سی او سی) دے چیئرمین اسد عمر نے کہیا اے کہ 17 سال تے ایس توں ودھ عمر دے پڑھیاراں لئی 15 ستمبر تک اِک ویکسین لگوانا لازمی ہووے گا‘ پڑھیاراں دے ٹرانسپورٹیشن عملے لئی 31 اگست تک ویکسی نیشن لازمی ہووے گی جد کہ 30 ستمبر دے بعد مکمل ویکسی نیشن نہ ہون اُتے اندرون یاں بیرون ملک لئی ہوائی سفر دی اجازت نہیں ہووے گی۔ نیشنل کمانڈ اینڈ اپریشن سینٹر وچ وزیراعظم دے معاون خصوصی برائے صحت فیصل سلطان دے نال میڈیا نُوں بریفنگ دیندیاں ہویاں اسد عمر نے کہیا کہ جے تُسیں مکمل ویکسی نیشن کروان وچ ناکام رہے او تے پاکستان توں باہر جان تے پاکستان داخل ہون دی اجازت نہیں ہووے گی۔ لوکاں دی وڈی گنتی شاپنگ مال جاندی اے‘ شاپنگ مال لئی وی 31 اگست تک سنگل ویکسی جد کہ 30 ستمبر تک مکمل ویکسی نیشن دا ہدف مقرر کیتا اے‘ ایس لئی جے ویکسی نیشن مکل نہیں کروائی تے عملا کم کر سکے گا تے نہ ای لوک شاپنگ لئی جا سکن گے۔ اسد عمر نے کہیا کہ 17 سال تے ایس توں ودھ عمر دے پڑھیاراں لئی 15 ستمبر تک 1 ویکسین لگوانا لازمی ہووے گا تے 15 اکتوبر تک مکمل ویکسی نیشن نہیں کراوئی تے اوہ تعلیمی اداریاں وچ نہیں جا سکن گے‘ ماپے بچیاں دی صحت نُوں اہمیت دیندیاں ہویاں اوہناں دی ویکسی نیشن لازمی کروان۔ این سی او سی دے چیئرمین نے واضح کیتا ٹرین‘ بس یاں ہور عوامی سواریاں توں مستفید ہون والے تے ایہدے عملے لئی 15 ستمبر تک اِک ویکسین لگوانا لازمی اے جد کہ 15 اکتوبر تک مکمل ویکسی نیشن نہیں کروائی تے سفر تے ملازمت دی اجازت نہیں ہووے گی۔ اوہناں نے ہور دَسیا کہ این سی او سی دے اجلاس وچ فیصلا کیتا گیا کہ ہوٹل تے گیسٹ ہاؤس وچ وی 30 اگست تے 30ستمبر نُوں پابندیاں لاگو ہون گیاں۔ معاون خصوصی فیصل سلطان نے کہیا کہ پہلی ستمبر توں 17 سال توں اُتے نوجواناں لئی ویکسی نیشن شروع کر رہے آں‘ کمزور دفاعی نظام دے حامل نوجواناں لئی مخصوص ویکسی نیشن شروع کر رہے آں‘ کسے دوجے ملک توں ویکسی نیشن کروان والے بندیاں دا اندراج وی نادرا ویب سائٹ اُتے ہو سکے گا‘ ویکسین لگواؤ تے اصل کرونا ویکسی نیشن سرٹیفکیٹ نادرا ویب سائٹ توں حاصل کرو۔ اوہناں نے کہیا کہ جہڑے لوک جعلی ویکسی نیشن کارڈ بنا رہے نیں اوہناں دے خلاف ایف آئی ا ے تے ہور قانون نافذ کرن والے ادارے کریک ڈاؤن کر رہے نیں۔