وفاقی کابینا نے 37 دوائیاں دیاں قیمتاں و چ وادھے دی منظوری  ……٭رویل خبر٭

اسلام آباد (نیوز ڈیسک) وفاقی کابینا نے 37 دوائیاں دیاں قیمتاں و چ وادھے دی منظوری دے دِتی۔ وزیراعظم عمران خان دی صدارت ہیٹھ وفاقی کابینا دا اجلاس ہویا جہدے وچ انتخابی اصلاحا ت آرڈیننس دی منظوری دے دِتی گئی‘ جہدے تحت سینیٹ‘ قومی تے صوبائی اسمبلیاں دے اراکین نُوں 60 دن وچ حلف لین دا پابند بنایا گیا اے‘ 60 دن وچ حلف نہ لین والے دی سیٹ خالی سمجھی جاوے گی۔ اجلاس بعد میڈیا بریفنگ دیندیاں ہویاں وزیر اطلاعات فواد چودھری دا کہنا سی کہ پاکستان نے ہزاراں غیر ملکیاں نُوں افغانستان توں انخلاء وچ مدد فراہم کیتی اے‘ افغانستان وچ حکومت بنن بارے پاکستان ذمے دارانا کردار ادا کر رہیا اے‘ بھارت افغانستان وچ مداخلت توں باز رہوے۔ امید اے کہ عالمی برادری بھارتی حرکتاں دا نوٹس لوے گی۔ فواد چودھری نے کہیا کہ وزیراعظم نے مینار پاکستان واقع نُوں انتہائی تشویش ناک متھ دِتا اے‘ ایہو جہے واقعات دی روک تھام لئی اعلا سطح کمیٹی تشکیل دِتی جا رہی اے جہڑی حکومت دی رہنمائی کرے گی۔ کابینا نے ڈاکٹر اشفاق نُوں نواں چیئرمین ایف بی آر تعینات کرن تے 37 دوائیاں دیاں قیمتاں وچ وادھے دی منظوری دے دِتی۔ کابینا نے ڈاکٹر ندیم ظفر نُوں ادارا شماریات دا آگو تعینات کرن تے ڈاکٹر احمد مجتبیٰ نُوں انٹیلیکچوئل پراپرٹی آرگنائزیشن دے چیئرمین دا وادھو چارج دین دی وی منظوری دِتی۔ وفاقی وزیر نے ہور کہیا ک اپوزیشن اوور سیز پاکستانیاں نُوں ووٹ دا حق نہیں دینا چاہندی ایہ اِک سازش دے تحت کر رہے نیں‘ معاشی اعشاریے مستحکم نیں‘ برآمدات وچ وادھا جد کہ مہنگائی وچ کمی آ رہی اے‘ بزنس انڈیکس وچ وی 108 فیصد دا نمایاں وادھا ریکارڈ کیتا گیا اے۔ وفاقی وزیر نے کہیا پاکستان غیر ملکیاں نُوں بارڈر دے راہ پاکستان آن دے اجازت نامے دے رہیا اے‘ کسے افغانی نُوں پاکستان نہیں آن دِتا جا رہیا‘ افغانیاں بارے اوتھوں دی حکومت نے پالیسی بنائی اے تے افغانیاں لئی عام معافی دا اعلان کیتا جا چُکیا اے‘ قبولن جوگ وجھا یاں دستاویزات دے نال پاکستان آن والیاں نُوں خُش آمدید کہیا جاوے گا۔ اوہناں نے کرونا وائرس بارے گل کردیاں ہویاں کہیا کہ کووڈ اُتے معاملات بہتر ہو رہے سن پر خیبر پختونخوا تے پنجاب د ے ہسپتالاں وچ گنتی دُبارا 1500 ہو گئی اے تے 70 فیصد آکسیجن ستعمال ہو رہی اے۔ کووڈ دی صورتحال اِک دو دن وچ بہتر نہیں ہوئی تے سانوں صنعت لئی گیس دی فراہمی گھٹ کرنی پوے گی تاں جے روگیاں نُوں آکسیجن فراہم کیتی جا سکے جد کہ پاکستان وچ 37 نویاں دوائیاں بنان دا کم شروع ہو رہیا اے‘ جہناں دی قیمت مقرر کر دِتی گئی اے تے 12 دوائیاں دی قیمت وچ ردو بدل کر دِتا یگا اے۔ وفاقی وزیر نے کہیا کہ ندیم ظفر نُوں چیف شماریات مقرر کیتا گیا اے‘ جو اہم عہدا اے کیوں جے آدم شماری دے حوالے توں معاملات چل رہے نیں تے ایہ عہدا 3 سال توں خالی سی۔