ارشاد سندھو ہوراں دی اے پی ایس وچ شہید ہوون والیاں بارے نظم ــــ رویل

"اینے سستے"

اکھاں حالے کیہ تکنا اے

حالے کِنا لہو اے ڈُلھنا

ایس توں اگے حد اے کہڑی

اِس توں ودھ کے دوزخ کہڑا

کتھے گئے پرچار وفا دے

جھوٹے دعوے دار وفا دے

نہ کوئی اگ بجھاون آیا

نہ کوئی دُکھ ونڈاون آیا

ہمتاں نوں کیوں کیڑی پئے گئی

سوچ نوں کہڑے سپ نےسُنگھیا

غیرت کِدھرے مر گئی خورے

تاں ای قِسمت ہر گئی خورے

ایڈے ایڈے مارو سوں گئے

امناں دے پرچارو سوں گئے

ویکھ کے وی بربادی چُپ نیں

اج کیوں یار جہادی چُپ نیں

گئے اج ڈھیر بہادر کتھے

ساڈے شیر بہادر کِتھے

بمباں دے اچار چا پاؤ

کُتیاں دے گل ہار چا پاؤ

جہڑے بندے داڑھی جاندے

وڈھی، ٹُکی ساڑی جاندے

سجرے پُھل لتاڑی جاندے

چھاواں سولی چاڑھی جاندے

اِک اِک باغ اُجاڑی جاندے

تینوں منن والے ربا

اینے سستے

اینے سستے