کرونا وائرس نال 24 گھنٹیاں وچ141 بندے چلانا کر گئے،4199 نویں روگی ……٭رویل خبر٭

اسلام آباد (نیوز ڈیسک) پورے ملک وچ کرونا وائرس نال 24 گھنٹیاں دے دوران ہور 141 بندے چلانا کر گئے۔ نیشنل کمانڈ اینڈ اپریشن سینٹر ولوں جاری بیان دے مطابق پچھلے 24 گھنٹیاں دے دوران پور ے ملک وچ کرونا دی تشخیص لئی 61 ہزار 410 ٹیسٹ کیتے گئے جہناں وِچوں 4199 بندیاں وچ کرونا وائرس دی تصدیق ہوئی۔ پچھلے دن ایس وباء نے ہور 141 بندیاں دیاں زندگیاں نُوں نگل لیا۔ جد کہ مثبت کیساں دی شرح 6.38 فیصد ریکارڈ ہوئی اے۔ دوجے پاسے حکومت نے بیرون ملک جان دے منتظر بندیاں نُوں بوسٹر ڈوز لان دا اصولی فیصلا کر لیا اے تے بیرون ملک جان والیاں دی بوسٹر ویکسی نیشن لئی حکمت عملی وی تیار کر لئی گئی اے۔ حکومت ولوں بوسٹر ویکسی نیشن دا اغاز چالو مہینے ہوے گا تے ویکسی نیشن دا سلسلا مخصوص شہراں وچ ہووے گا۔ وسیلیاں دا کہنا اے کہ بیرون ملک جان والیاں دی بوسٹر ویکسی نیشن لئی وکھرے کاؤنٹر ہون گے تے ایہناں بندیاں نُوں امریکی تے برطانوی بوسٹر ڈوز لائی جاوے گی۔ وسیلیاں دا کہنا اے کہ بوسٹر ڈوز والیاں توں ویکسین قیمت تے ایڈمنسٹریشن چارجز لئے جان گے پر بیرون ملک جان والیاں دی بوسٹر ویکسی نیشن سفری دستاویزات نا ل مشروط اے۔ وسیلیاں د ے مطابق بوسٹر ویکسی نیشن دے چاہیواناں لئی ویزا وکھانا لازمن ہووے گا فیر ویکسین دی بوسٹر ڈوز لائی جاوے گی تے بعد وچ بیرون ملک جان دے منتظر بندیاں نُوں بوسٹر ڈوز دا سرٹیفکیٹ جاری ہووے گا۔ اودھر کمشنر لاہور نے ویکسی نیشن نہ کروان والے بندیاں اُتے پبلک تھاواں وچ داخلے دی ڈیڈ لائنز مقرر کر دِتی اے۔ محکما تعلیم نا ل جُڑے بندیاں استاداں‘ انتظامیا تے ٹرانسپورٹ نُوں پہلی ویکسی نیشن ڈوز لگوان لئی 31 اگست دی ڈیڈ لائن مقرر کیتی گئی اے‘ محکما تعلیم نال جُڑے بندیاں لئی دوجی خوراک لگوان دی ڈیڈ لائن 30 ستمبر مقرر کیتی گئی اے‘ ہر قسم دی پبلک ٹرانسپورٹ وچ ٹرمنلز اُتے کم کرن والے بندیاں لئی پہلی ڈوز دی ڈیڈ لائن 15 ستمبر جد کہ دوجی 15 اکتوبر مقرر کر دِتی گئی۔ ہوٹلز‘ ریسٹورنٹ تے شادی ہالز وچ داخلے لئی 30 ستمبر تک ویکسی نیشن لازمی قرار۔ میٹرو‘ اورنج ٹرین تے بی آر ٹی و چ سفر لئی ویکسی نیشن دی پہلی ڈوز لگوان دی ڈیڈھ لائن 31 اگست مقرر کیتی گئی اے جدکہ پہلی ستمبر توں 15 ستمبر تک ویکسی نیشن دی اہمیت نُوں اجاگر کرن لئی آگاہی مہمچلان دا فیصلا کیتا گیا اے۔