کاما ۔۔۔۔۔٭رویل کہانی٭

جیرے دی عمر پندرھاں ورھیاں توں ودھ تے ویہاں توں گھٹ ای ہونی اے ۔ رنگ کالا ، نک پِھینا تے سیہ دے کنڈیاں جہے وال متھے اُتے چھاں کیتی رہندے - جواں تے لیکھاں نال بھرے وال بُور نال پروئے بیری دے ٹاہن لگدے - اوہدیاں مگرمچھ دیاں اکھاں تے کالے بُلھاں اچ پھسیا چپ دا ڈراوا بولن آلے سہندے پھردے ۔ چھج جہے وڈے کن دور توں ای گلاں سن لیندے تے جیرا ایہناں دے چھٹ بھڑولے بھردا رہندا ۔ ہتھاں دیاں موٹیاں انگلاں توں رِچھ دا بھرا جاپدا ۔ اوہدے دوجے بھرا وی کوئی سوہنے نہیں سن پر جدوں جیرا جمیا تے اوہدی ماں دا تراہ نکل گیا ۔ اوہدی ماں نوں اک واری تے جھاکا پیا ، کوئی لُدھر جم پیا اے ۔ ماں کِنے مہینے لکوندی رہی ۔ تھوڑا وڈا ہویا تے رڑھ رڑھ کے گلی ول بھج بھج جاندا ۔ اوہنوں گھر دی تھڑی تے بیٹھے ویکھ کے گلی دے وسنیکاں دے نکے وڈے خوف مُک گئے ۔ جیرا ہون گلی دا نظر وٹو سی ۔

ایہنوں ویلے دی ہونی سمجھئے کہ جیرے دے جمن آلے سال ای لوکاں گھراں اچ گٹر بنا لئے ۔ گٹر دا پانی محلے دی گلیاں اچ کھلوتا رہندا ۔ دوجے محلیاں دے گٹر وی ایہناں گلیاں اچ مونہ کھول لیندے ۔ اُبلدے گٹر جیرے دے ہانی سن تے اوہ اک دوجے توں اولھے نہ ہوندے ۔ جیرے دے ہانی منڈے کرکٹ کھیڈدے تے اوہ اڈیکدا رہندا کوئی کھیڈن لئی واج مارے ۔ جد کسے واج نہ ماری تے اوہ محلے اچ بغیر رَسی توں پھرن آلے کتیاں دا بیلی بن گیا ۔ اوہ سکیاں تے بہیاں روٹیاں کٹھیاں کر کے کتیاں نوں کھواندا ۔ جیرا کتیاں دی پوری ٹیم بنا کے ریس لاندا ۔ کوئی وی کتا ایس ریس دا جیتو نہ بن دا کیوں جے سارے اوہدے پچھے بھجدے ۔ کتیاں اوہنوں مالک من لیا ہویا سی ۔ جیرا ریس توں تھک کے بہ جاندا تے کتے اوہنوں اپنا بیلی جان کے چمدے چٹدے-

جیرے اچ ایہ وادھا سی کہ اوہ دل دا صاف تے ساؤ منڈا سی ۔ لوکاں دیاں اکھاں اچ وسّے اوہدے کوجھ ای بھاویں اوہنوں ساؤ بنایا ہووے ۔ اوہدے کوجھ توں سُراں دا سوما پھٹدا تے گانے سنن لئی لوکی اوہنوں شاماں ویلے اپنے کول بھا لیندے ۔ انھیرے اچ اوہدی اواز دا سواد سارے لیندے تے کوجھ بھُل جاندے ۔ کوجھ انھیرے نال انج رل جاندا جویں مٹی نال مٹی ۔

"جیرے ! اک صاب دے گھر کم کریں گا ؟ "اچھو مسیح سڑک اتے اپنی ٹور مَٹھی کردے ہوئے اک دن پارک اچ کتیاں نال کھیڈدے ہوئے جیرے نوں پچھیا ۔ اچھو دی گل سن کے جیرا نیڑے آ گیا ۔ پارک دے لمے گھاہ اچ لکدے کھیڈدے کتے وی جیرے دے کول آ کھلوتے ۔ اوہ وی پوشلاں ہلا ہلا کے اچھو دی گل سنن مگروں بھونکن لگ پئے ۔ شید اوہناں نوں شک پے گیا سی اچھو جیرے نوں رسّی پان لگا اے ۔

کتھے تے کیہڑا کم ؟ جیرے اچھو نوں پچھیا ۔ ایتھے نیڑے ای ، تیری مرضی دا کم ہووے گا ۔ تنخاہ وی چنگی لبھے گی ۔

جیرا تنخاہ دا سن کے خش ہویا ۔

فیر کدوں صاب کول چلیے ؟

چل ہون ایڈا وی سوڑا نہ پے ، کسے دن چلے جاواں گے ۔

اچھو گل کر کے اگے ٹر پیا تے جیرا کتیاں نال پارک اچ کھیڈن لگ پیا ۔

اچھو مسیح کول شراب دا پرمٹ سی تے اوہ محلے دی سڑک توں دو کلے دور نویں ٹاؤن دے صاباں نوں شراب سپلائی کردا ۔ جتھے اوہدی شراب چوکھی لگدی اوتھے صاباں دا کر کے تھانے آلے وی اچھو نوں ہتھ نہ پاندے ۔

دو دن لنگھے تے اچھو قبرستان اچ امب دے بوٹے تھلے کھلو کے جیرے نوں واج ماری ۔ جیرا اک ٹاہن تے کھلو کے امبیاں لاہندا پیا سی ۔ جیرا تھلے لتھا تے اوہدی گنڈھ وجی جھولی امبیاں نال بھری ہوئی سی ۔ اک پکی امبی کڈھ کے اوس اچھو نوں دتی ۔ ہون جیرے دے نال اچھو دے دند وی کھٹے ہو گئے ۔

اچھو تے جیرا اپنے محلے دیاں گلیاں اچوں لنگھدے بالاں نوں امبیاں دیندے وڈی سڑک تے آ کھلوتے ۔ سڑک ٹپ کے اوہ ٹاؤن نوں جان آلی کچی سڑک اتے ٹرن لگ پئے ۔ جیرا اج پہلی واری ایس ٹاؤن دے اندر پیر رکھن لگا سی ۔ گیٹ تے کھلوتے بندوقاں آلے گاڈاں کولوں لنگھدے جیرے دے پیر تھڑکّے ۔ گاڈاں اوہنوں نظیر لا کے ویکھیا پر اچھو دی وجہ نال کھلار کے پچھن توں باز رہے ۔ اچھو نال ایہناں گاڈاں دی روز سلام دعا ہوندی سی ۔ ٹاؤن دے اندر گھاہ دے لان ، لمیاں چوڑیاں سڑکاں تے وڈیاں کوٹھیاں توں جیرے نوں خیال اُگیا کہ ایتھے کوئی نویکلی نسل رہندی اے ۔

یار اچھو، ایتھے تے جگن پور پنڈ ہوندا سی - جیرے حریان ہو کے پچھیا -

توں کہڑے ویلے دیاں گلاں کرنا ایں ، ساڈا شہر ہن پنڈ کھاندا اے - جتھے مُنجی کنک ہوندی سی اوتھے ہن پلازے کوٹھیاں اُگدے نیں -

پنج دس منٹ ٹرن توں بعد اوہ اک وڈی کوٹھی دے گیٹ اگے جا کھلوتے ۔ اچھو گھنٹی دبّی تے اک گن مین، جہڑا اچھو نوں پہلاں ای اُڈیک رہیا سی ، نکا گیٹ کھول دتا ۔ دو لمّے چوڑے ہرے لاناں دے وچکار پتھر دے بنے راہ اتے چلدے اوہ دوویں کوٹھی دے پچھلے پاسے کواٹر اچ وڑ گئے ۔ ایہ کواٹر وی کوٹھی توں گھٹ نہیں سی ۔ کواٹر دے اندر السیشن ، سپینئل تے گولڈن ریٹریور کتے بجھے سن ۔ اک وڈے جنگلے دے اندر مور ، تتر ، ہرن تے طوطے سن ۔ کواٹر دے تن چار کمرے وی سن ۔ اچھو تے جیرا جنگلے نال لگ کے ہرن نوں ویکھ رہے سن کہ پچھوں صاحب آ گیا ۔ ہرن آلے جنگلے دے نال لان اچ چھاں لئی بنے چھجے ہیٹھ میز تے چار کرسیاں پیاں سن ۔ صاحب اک کرسی تے جا بیٹھا ۔ اچھو تے جیرا کندھ دی چھاں اچ گھاہ اتے گوٹھ مار کے بہ گئے ۔

ہاں فیر اچھو ایہ کم کر لویں گا ؟

کر لوے گا سرکار ۔

ناں کیہ اے ایہدا ؟

جیرا -

صاحب جیرے نوں ویکھدے ای سمجھ گیا ایہ پشو کتیاں نال موجاں لا لوے گا ۔ اچھو وی جیرے دے کن اچ کم بارے دس دتا ۔ جیرے سر ہلا کے خشی نال پولی جہی ہاں کر دتی ۔

"تنخاہ کنی ٹھیک اے ؟ "صاحب اچھو نوں پچھیا۔

"ویکھ لوو ! جنی تہانوں ٹھیک لگے ۔ "

ست ہزار تنخاہ مُکی ۔ صاحب دے نال جیرا وی خش سی ۔ پہلی واری تنخاہ لبھن دی چس اوس ہون توں ای محسوس کرنی شروع کر دتی ۔

اوہناں دے بیٹھیاں ای بلدیا دا اک نوکر آن کھلوتا ۔ اوہ صاحب نوں کتیاں دی دوائی دین آیا سی ۔ اچھو تے جیرے اُٹھ کے صاحب نوں سلام کیتا تے دوجے دن آون دا کارا کر کے باہرلے گیٹ ول ٹر پئے ۔ گیٹ توں باہر نکل کے جیرا اچھو نوں آکھدا اے

“ یار اینا وڈا تے سوہنا گھر اے ، ایہہ صاحب کیہ کم کردا ہووے گا “۔

ایہ فوج اچ کرنل سن تے ہن رٹیر ہو کے بلدیہ دے افسر نیں ۔ اچھو دے ایس جواب نال جیرے مسکین جہیا مونہ بنایا تے آکھن لگا

“ ایہ کیہڑیاں ماواں کرنل جمدیاں نیں”؟

"ایہ مینوں وی نہیں پتہ پر اک گل دا پک ضرور اے ۔"

"کیہڑی گل ؟" جیرے پچھیا ۔

اوہ ماواں ساڈے محلے نہیں رہندیاں ۔

اچھو تے جیرا ایہ گلاں کردے محلے کول اپڑ گئے سن ۔ جیرے دے بیلی گلی دی نکر تے کھلو کے پوشلاں ہلائی جاندے تے چوں چوں وی کردے ۔ انج لگدا جویں اوہ جیرے توں ہسڑ پئے ہون ۔ چاروں کتے بھج کے جیرے دے پیراں نال چنبڑ گئے تے چمن لگ پئے ۔ اچھو اوہناں نوں اوتھے چھڈ کے اگے لنگھ گیا ۔ جیرا اوہناں کتیاں دے سراں تے کنڈاں اتے ہتھ پھیردا پارک ول ٹر پیا ۔

جیرے اگلے دن ای کرنل صاحب دے گھر کم شروع کر دتا ۔ جنوراں تے پرندیاں دیاں خیال رکھنا ، کتیاں نوں نوانھا دھوانا تے اوہناں نال کھیڈنا ای دن دا کم سی ۔ پورا ہفتا لنگھ گیا ۔ محلے دے کتے نہ اوہنوں ملے ، نہ اوس لبھن دی کوشش کیتی ۔ اوہ کتھوں لبھدا ، شام ویلے تے اوہ گھر پرتدا سی ۔ سچی گل تے ایہ سی کہ اوہنوں کرنل دے باہرلی نسل دے کتیاں محلے دے پھراکل کتے بھلا دتے سن ۔

محلے دے کتیاں نوں جیرا نہ لبھا تے اوہ دوجے راہیاں دا پچھا کردے ۔ اوہناں دے بھونکن نال راہی ڈر کے بھجدے تے کتے وی اوہناں دے پچھے بھجدے ۔ کتے چٹن لئی پیر لبھدے پھردے سن ۔ اوہناں نوں بَہیاں روٹیاں وی پان لئی کسے نوں خیال نہ آیا ۔

“کتے دے وڈھن دا علاج دھنی اتے چھ ٹیکے نیں “۔ ایس خوف پاروں محلے دے وسنیکاں کمیٹی آلیاں نوں شکیت پا دتی کہ کتے ہلکے ہو گئے نیں ۔ کمیٹی آلیاں موہرا پایا پر کتے فیر وی نہ مرے ۔ محلے اچ خوف دا پاہرا لگا ۔ کمیٹی آلے بندوقاں کس کے محلے اچ آ کھلوتے ۔ کتے ایس محلے دے جماندرو سن ، اوہ نس کے کتھے جاندے ۔ نالے اوہناں نوں کیہ پتا بندوقاں اوہناں اتے چل جانیاں نیں ۔ قبر ستان نیڑے ٹھاہ ٹھاہ دی اَواز دھمی تے دو کتے کنڈ پرنے بھوئیں تے ڈگے ۔ چھرے اوہناں دی کھل اچ موریاں کر کے اندر لہو اچ ڈب کے ٹھنڈے ہو گئے تے کتے وی ہولی ہولی چوں چوں کر کے ٹھنڈے ہوندے گئے ۔ تریجے کتے نوں چھَرے تے لگے سن پر فیر وی اوہ کرلاندا ہویا گلی اچ وڑ گیا ۔ محلے دے بال وی کٹھے ہو گئے سن ۔ کمیٹی آلے کتے دے پچھے بھجے ۔ بال وی رولا پاندے اوہناں دے پچھے نسے ۔ کمیٹی دے ملازم اک ہور فایر کیتا جہڑا سدھا بھجدے کتے دی وکھی اچ لگا ۔ کتا گلی اچ کھلوتے گٹر دے پانی اچ چیک مار کے ڈگا ۔ اوہدی چیک سن کے بالاں وی چیکاں ماریاں ۔ ایہ خشی تے جت دیاں چیکاں سن ۔

جیرا شام ویلے اپنے محلے پرتیا تے گلی اچ لوک کٹھے ہو کے گلی اچ موئے کتے بارے گلاں کردے پئے سن ۔ کمیٹی آلے کتے نوں مار کے جیرے دے گھر کول چھڈ گئے سن -

موئے کتے نوں چکن تے کوئی وی راضی نہیں سی ۔ اک پلیت اتوں مویا ۔ جیرے اپنے بیلی نوں پانی اچ بے حرکتا ویکھیا تے اوہنوں اپنے اتے غصا آیا ۔

جے اوہ نوکری نہ کردا تے اج اوہنوں پھلے ڈڈھ نال اپنا یار ویکھنا نہ پیندا ۔ دوجے لوکاں وانگ جیرے نوں وی پتاسی کہ سویر تک بو چواں پاسے کھلر جانی اے ۔ جیرے کتا اپنیاں باہواں اچ چکیا تے قبرگستان ول ٹر پیا - اوہدا دل کیتا کہ اوہ کتے نوں اپنے خاندان دیاں قبراں نیڑے دفن کرے پر اوہ پچھے کھلوتے لوکاں دے اجڑ توں ڈر گیا ۔ جیرے اک اچے ٹیلے دے نیڑے کتے نوں لٹا دتا ۔ ایہ ٹیلا کدی پارسیاں دا چُپ مینار ہوندا سی - جیرے اپر انبر ول تکیا ، اوتھے صرف اِلاں گولائی اچ اڈدیاں پئیاں سن ۔ پرتن ویلے جیرے نوں راہواں تے گلیاں سنجیاں دسن ۔ کمیٹی آلیاں اگلے دو دناں اچ سارے دیسی ہلکے کتے مار مکائے ۔ جیرے نوں ہون نویں فکر پے گئی سی ۔ چٹا دِن چڑھیا تے اوہ کرنل دے گھر ول بھجیا ۔ اوہنوں اوہ کمیٹی آلا یاد آ رہیا سی جس نوں کرنل دے گھر ویکھیا سی ۔ راہ چلدے ہوئی اوس دوروں اک بندوق آلے بندے نوں ویکھیا ۔ جیرا ڈر نال تیز چلن لگ پیا ۔ تیز تیز چلدے اوہ کرنل دے گھر اپڑیا ۔ کتے اوہنوں ویکھ کے خشی نال پوشلاں ہلان لگ پئے ۔ جیرے دے ساہ سدھے آونے شروع ہوئے ۔ جیرا گولڈن کتے دے وال بُرش نال صاف کرن لگ پیا ۔ کجھ چر مگروں کمیٹی دا ملازم وی اہدے پچھے آ کھلوتا ۔ اوہنوں ویکھ کے جیرے دا ساہ سُک گیا ۔ جیرے نوں ہن یقین ہو گیا ایہ کتے وی اج نہیں بچدے ۔ کرنل صاحب وی پتا نہیں کتھے رہ گئے سن ۔ کمیٹی آلے بندے اپنا کپڑے دا تھیلا کھولیا تے اوہدے اچوں سرنچ تے دوائی دی شیشی کڈھی ۔ اوہ کتیاں نوں ٹیکے لاندا رہیا تے جیرا کول کھلو کے ڈر پاروں ویکھدا رہیا ۔ جیرے نوں حالے وی ڈر سی کہ جے کر اوہنوں روکیا تے اوہ فیر مار دیوے گا ۔ ٹیکے لا کے اوس اپنے جھولے نوں گنڈھ ماری تے ٹردیاں جیرے نوں آکھن لگا “ کرنل صاحب نوں دس دینا ویکسین لا دتی اے ، ہُن کتے بیمار نہیں ہون گے “ ۔ جیرا اوس کمیٹی دے ملازم نوں کنڈ پچھوں ویکھدے سوچن لگ پیا کہ اوہدے محلے دے کتیاں نوں ویکسین دی تھاں فیر کیوں مارے ۔

٭٭٭٭٭