ڈاکٹر عبدالقدیر خان اسلام آباد دے ایچ 8 قبرستان وچ سرکاری اعزاز دے نال  دفن،نماز جنازا فیصل مسجد وچ ادا کیتی گئی……٭رویل خبر٭

اسلام آباد (نیوز ڈیسک) ایٹمی سائنسدان ڈاکٹر عبدالقدیر خان 85 ورھیاں دی عمر وچ چلانا کر گئے‘ ڈاکٹر عبدالقدیر خان نُوں پھیپڑیاں وچ تکلیف دے کارن ہسپتال منتقل کیتا گیا سی پر اوہ بچ نہ سکے تے خالق حقیقی نال جا ملے۔ دَسیا گیا اے کہ ڈاکٹر عبدالقدیر خان نُوں سویرے 6 وجے دے نیڑے کے آر ایل ہسپتال لیاندا گیا سی جتھے اوہناں دی طبیعت بہت خراب ہو گئی سی‘ ڈاکٹراں نے ایٹمی سائنسدان نُوں بچان دی پوری کوشش کیتی پر سویرے 7 وج کے 4 منٹ اُتے اوہ دار فانی توں کوچ کر گئے۔ ڈاکٹر عبدالقدیر خان نُوں اسلام آباد دے ایچ 8 قبرستان وچ سرکاری اعزاز دے نال خاک حوالے کر دِتا گیا۔ ایس توں پہلاں اوہناں دی نماز جنازا فیصل مسجد وچ ادا کیتی گئی سی جہدے وچ وفاقی وزیراں‘ اراکین پارلیمنٹ تے عسکری قیادت نے رلت کیتی۔ نماز جنازا دے موقع اُتے لوکائی دی وڈی گنتی وی موجود سی‘ سیکیورٹی اداریاں نے ایس دوران سخت حفاظتی انتظامات کر رکھے سن‘ ڈاکٹر اے کیو خان دی دفنائی اسلام آباد دے ایچ 8 قبرستان وچ مکمل سرکاری اعزاز دے نال کیتی گئی‘ ہتھیار بند فوجاں دے چا ق و چوبند دستے نے گارڈ آف آنر پیش کیتا۔ ڈاکٹر عبدالقدیر خان دی قبر اُتے چیئرمین جوائنٹ چیف آف سٹاف کمیٹی‘ آرمی چیف تے پاک فضائیا ولوں پھُل چڑھائے گئے۔ یاد رہوے کہ ڈاکٹر عبدالقدیر خان نُوں چالو ورھے اگست دچ کرونا دے کارن ہسپتال منتقل کیتا گیا سی پر اوہناں دی کرونا دی رپورٹ منفی ہون دے بعد ایٹمی سائنسدان نُوں گھر منتقل کر دِتا گیا سی۔ پاکستان نُوں ایٹمی قوت بنان تے ایہدا دفاع ناقابل تسخیر بنان وچ ڈاکٹر عبدالقدیر خان دا انتہائی اہم کردار سی۔ مئی 1998 و چ پاکستان نے بھارتی ایم بمب دے تجربے دے بعد کامیاب تجربا کیتا۔ بلوچستان دے شہر چاغی دے پہاڑاں وچ ہون والے ایس تجربے دی نگرانی ڈاکٹر قدیر خان نے ای کیتی سی۔