آئین دے بغیر ملک قائم نہیں رہ سکد ا اے نہ چل سکدا اے‘ ووٹ نُوں عزت دِتی جاوے:رانا ثنا ء اللہ ۔۔۔۔٭رویل خبر٭

جڑانوالا (نمایندا رویل) پاکستان مسلم لیگ (ن) دے آگو رانا ثناء اللہ نے کہیا اے کہ اپوزیشن نال نفرت رکھن والی قیادت ملک نُوں اگے لے کے نہیں جا سکدی‘ ملک تباہی دے دہانے اُتے کھلوتا اے‘ ایہدی ذمے داری کسے نُوں لینی چاہیدی اے‘ ملک نُوں آئین د ے مطابق چلانا ہووے گا‘ ہر کسے نُوں اپنیاں آئینی حداں دا تعین کرنا پوے گا‘ آئین دے بغیر ملک قائم نہیں رہ سکد ا اے نہ چل سکدا اے‘ ووٹ نُوں عزت دِتی جاوے تے ملک وچ صاف تے شفاف چوناں کروانیاں چاہیدیاں نیں۔ میڈیا نال گلبات کردیاں ہویاں اوہناں نے کہیا کہ اسلام آباد دیاں خبراں مایوس کن نیں‘ انتہائی خطرناک نیں۔ اوہناں نے کہیا کہ ایس کٹھ پتلی نُوں ملک اُتے مسلط کر کے‘ لوکائی دے میڈنٹ نُوں چوری کر کے‘ الیکشن چوری کر کے کیہ حاصل کیتا گیا۔ اوہناں نے کہیا کہ اج ملک جہڑی تباہی دے بوہے اُتے کھلوتا اے ایہدی ذمے داری کسے نُوں لینی چاہیدی اے‘ ایس کٹھ پتلی نُوں مسلط کرن والیاں تے الیکشن چوری کرن والیاں نُوں اپنے اعمال ول ویکھنا چاہیدا اے کہ انج کرن دی وجھا توں اج ملک کہڑی حالت وچ پہنچ چُکیا اے۔ اوہناں نے کہیا کہ اج لوکائی کس حال نُوں پہنچ چکی اے‘ ایہ گل پوری طرحاں توں عیاں ہو چکی اے تے لوکائی نُوں ادراک ہو چُکیا اے۔ اوہناں نے کہیا کہ جے ایس ملک نے اگے ودھنا اے تے قائم رہنا اے تے ملک نُوں آئین دے مطابق چلانا پوے گا‘ ہر کسے نُوں اپنیاں آئینی حداں دا تعین کرنا پوے گا‘ آئین دے بغیر ملک قائم نہیں رہ سکدا نہ ای چل سکدا اے۔اوہناں نے کہیا کہ ایہ ملک قائم رہوے گا تے انشاء اللہ ملک اگے ودھے گا۔ اوہناں نے کہیا کہ صاف تے شفاف الیکشن دے بغیر کوئی حل نہیں اے۔ اوہناں نے کہیا کہ موجودا حکمراناں دے دور اقتدار وچ ملک ہر دن تباہ ول جاوے گا تے حالات خراب ہوندے چلے جان گے۔ اوہناں نے مطالبا کیتا کہ لوکائی دے ووٹ نُوں عزت دِتی جاوے‘ لوکائی دے مینڈیٹ دا احترام کیتا جاوے تے نہ کہ تبدیل کیتا جاوے۔