مہنگائی وچ گھاٹے لئی انتظامی تے پالیسی اقدامات جاری نیں:وزارت خزانا ……٭رویل خبر٭

کراچی (اُچیچا نمایندا رویل) وزارت خزانا دی رپورٹ دے مطابق معاشی ترقی بارے ورلڈ کپ دا حساب کتاب غیر حقیقی اے‘ عالمی بینک دا موجودا مالی سال معاشی شرح نمو 3.4فیصد رہن دا تخمینا غلط اے۔ وزارت خزانا دی رپورٹ دے مطابق موجودا مالی سال پاکستان دی معیشت 5 فیصد شرح نال ترقی کرے گی۔ عالمی بینک د ی رپورٹ دے مطابق پچھلے مالی سال 3.5 فیصد گروتھ رہی جد کہ وزارت خزانا مطابق پچھلے سال معاشی شرح نمو 3.94 فیصد توں وی ودھ رہی۔ وزارت خزانا دی رپورٹ دے مطابق وڈیاں صنعتاں تے زرعی پیداوار وچ وادھا حوصلا افزا اے‘ جولائی وچ لارج سکیل مینو فیکچرنگ وچ 2.3 فیصد بہتری آئی اے‘ گنے‘ چاؤل‘ مکئی‘ کپاہ دی فصل وچ وی بہتری دا تخمینا لایا گیا اے۔ وزات خزانا نے کہیا کہ سیمنٹ دی مقامی کھپت وچ 3.94 فیصد وادھا ہووے گا تے گڈیاں دی پیداوار تے ویچ وٹک وچ 92 توں 111 فیصد وادھا ہویا اے۔ وزارت خزانا نے عالمی بینک دی رپورٹ اُتے رد عمل ظاہر کردیاں ہویاں کہیا کہ مہنگائی وچ کمی لئی انتظامی تے پالیسی اقدامات جاری نیں۔ اِک سال وچ کھنڈ دی عالمی قیمت وچ 53.6 فیصد وادھا ہویا جد کہ مقام سطح اُتے کھنڈ 13.5 فیصد مہنگی ہوئی۔ عالمی مارکیٹ وچ پام آئل 48.4 فیصد، سویا بین54.4 فیصد مہنگا ہویا جد کہ کوکنگ آئل 37.3 فیصد‘ گھیو دی مقامی قیمت وچ 40.7 فیصد وادھا ہویا اے۔ کنک دی عالمی قیمت وچ 20 فیصد وادھا ہویا جد کہ پاکستان وچ کنک دا آٹا 19.3 فیصد مہنگا ہویا اے‘ خام تیل دی عالمی قیمت 1 سال وچ 81.5 فیصد ودھی جد کہ پاکستان وچ پٹرول 16.5 فیصد‘ ڈیزل 10.8 فیصد مہنگا ہویا اے۔ وزیر خزانا نے کہیا کہ شیواں دی بلا تعطل سپلائی لئی سستا بازار‘ یوٹیلیٹی سٹورز دا نیٹ ورک ودھان دا فیصلا کیتا اے‘ مہنگائی وچ کمی لئی لوڑی دیاں شیواں دے سٹریٹیجک ذخائر قائم کر رہے آں تے اگست دی نسبت ستمبر 2021 وچ عالمی مارکیٹ و چ قیمتاں و چ کمی دا رجحان رہیا تے قیمتاں وچ ہور استحکام آئے گا۔ ایہد ے علاوا معاشی شرح نمو دا ہدف وی حاصل کیتا جاو یگا۔ مہینا وار برآمدات 3 ارب ڈالر‘ ترسیلات زر 2.5 ارب ڈالر برقرار رہن دا تخمینا لایا گیا اے تے زراعت‘ صنعت‘تجارت تے ہور شعبیاں بارے حکومتی اقدامات دے مثبت نتیجے برآمد ہو رہے نیں۔ تعمیراتی شعبے لئی سہولتاں تے خصوصی اقتداری زونز وچ ٹیکس چھوٹ صنعتی ترقی دا کارن بنے گی۔ ایہدے علاوا سی پیک دے تحت اقدامات تے مراعاتی پیکج نال صنعتی سرگرمیاں تیز ہو رہیاں نیں تے کرونا ویکسی نیشن دے کامیاب پروگرام نال نجی شعبا جات قدرے بحال ہو چکے نیں۔