"پنجابی ایکا" دے پربندھ ہیٹھ کُل پنجاب پنجابی کانفرنس، اُچیچے پروہنے ریٹائرڈ جسٹس اصغر فہیم بھٹی سن……٭رویل خبر٭

لاہور (نمایندا رویل) پچھلے دن 10 اکتوبر 2021 ایتوار نُوں علمی ادبی تے ثقافتی ادارے ”پنجابی ایکا“ دے اہتمام ہیٹھ کل پنجاب پنجابی کانفرنس تے مشاعرا گورنمنٹ ہائی سکول 65A/GDشرقی جمعے والا وچ ہویا‘ صدارت الیاس گھُمن نے کیتی۔ اُچیچے پروہنے ریٹائرڈ جسٹس اصغر فہیم بھٹی سن جد کہ اعزازی پروہنے ایم۔ ڈی اشرف ایڈووکیٹ‘ یاسین مسکین‘ مہر نوشیر برال تے سید طاہر شیرازی سن۔ نظامت سید حاجی شاہ ساجد نے کیتی۔ الیاس گھُمن نے صدارتی گلبات کردیاں ہویاں کہیا کہ جہناں قوماں وچ زبا ن دی حکمرانی نہیں ہوندی اوہ سدا ذہنی غلام رہندیاں نیں۔ چین‘ جاپان تے ہور ملکاں نے مادری زبان نُوں پہلی جماعت توں تعلیم دا وسیلا بنایا اے تے بے پناہ معاشی ترقی کیتی اے۔ ہُن بیرون ملکاں دیاں مصنوعات پاکستان وچ وکدیاں نیں جہناں ا ُتے لکھیا ہوندا اے Made in Japan-China۔ پاکستانی لوکائی غیر ملکی مصنوعات خریدنا پسند کرد ے نیں جویں ٹچ موبائل تے لیپ ٹاپ وغیرا نیں۔ کسے وی معاشرے دی غربت دا مسئلا معاشی نہیں تعلیمی اے۔ تعلیم عام ہووے گی تے لوکائی دی زندگی دا معیار اُچّا ہووے گا۔ پنجاب ای اصل پاکستان اے باقی صوبے ایہدا کھاندے نیں تے گلے شکوے وی کردے نیں۔ سیاسی نمایندے وی پنجاب دا وزیر اعلا بننا لازمی سمجھدے نیں۔ اپنی غرض نُوں پورا کرن لئی ”جاگ پنجاب جاگ“ دا نعرا وی لاندے نیں پر اج تک کسے حکومتی پارٹی اتھارٹی نے باقی صوبیاں وانگوں پنجاب و چ پہلی جماعت توں تعلیم دا وسیلا مادری زبان نُوں نہیں بنایا۔ اللہ دے فضل نال عدالت عظمیٰ نے پہلی جماعت توں مادری زبان نُوں تعلیم دا وسیلا بنان دا آرڈر جاری کر دِتا اے بیورو کریسی ایہدے اُتے عمل نہیں کر رہی۔ ایس ضمن وچ پورے پنجاب توں پنجابی شاعراں‘ ادیباں تے پنجابی پروفیسر وغیرا 16 اکتوبر نُوں پریس کلب لاہور وچ اکٹھ کر رہے نیں تاں جے عدالت عظمیٰ دے جاری کردا ایس فیصلے اُتے عمل کروایا جا سکے۔ پنجابی کانفرنس وچ الیاس گھمن سنے سید حاجی شاہ ساجد تے پروفیسر احمد نواز کمیانا نے گلبات وچ حصا لیا۔ جد کہ ایم ڈی اشرف‘ اصغر فہیم بھٹی‘ یاسین مسکین‘ سید حاجی شاہ ساجد‘ نوشی برال تے سید طاہر شیرازی نے منظوم کلام پیش کیتا۔