ساڈی اکھ عقیدت مندیاں پِچھے بہ کے تکیا

تاں تے کُجھ وی دِسیا نہیں اے

چِٹے دِن وی سانوں

ساڈے ذہناں دیوے بالے

لے کے تیل اُدھارا

تاں تے ساڈے دِل دے ویڑھے

چانن ہو نہیں سکیا

ساڈی جِبھ نہیں پہرا دِتا

اپنے بولاں اُتے

تاں تے ساڈی گل تے انبراں

بھورا کن نہیں دھریا

ساڈے ساہواں تسبی کڈھی

اِکو منکے والی

تاں تے ساری عُمراں سُکھ دا

سانوں ساہ نہیں آیا

ساڈی روح وی ہتھ نیں سیکے

ڈر تے وہم دی اگ تے

تاں ساڈے لتھے نہیں نیں

حالے تیکر پالے

ساڈے پیراں ٹُرنا سِکھیا

وگیاں لیکاں اُتے

تاں تے اج تک ہوئی نہیں نیں

بہتے پینڈے ساتھوں

ساڈی سوچ نے عُمر ہنڈائی

لتھے لیڑے پاکے

تاں تے ساڈے ہیرو نے اج

ڈاکو چور لُٹیرے