درد گھٹاون والیاں کجھ غذاواں ۔۔۔۔۔٭رویل فیچر سیوا٭

پیڑ اصل وچ جسم اندرلے ساڑ‘ یاں تیزابیت دا ناں اے۔ پرانا ساڑدل دی بیماری پیدا کرن وچ وی حِصّالیندا اے۔ ایہدے نال آرتھرائٹس یعنی جوڑاں دا درد‘ دَمّا‘ کینسر تے ڈیمنشیا یعنی بھُلن کاری دے روگ وی پیدا ہوندے نیں۔ ایہدے اُتے قابو پا کے اسیں درد وی مُکا سکدے آں تے بیماریاں توں بچاء وی رہندا اے۔

کیہ تہانوں پتا اے کہ غذاواں وی تیزابیت پیدا کردیاں نیں۔ چینی تے سفید میدا ایس کم وچ وڈے مجرم نیں۔ چنگی خبر ایہ اے کہ خوراک راہیں تیزابیت نوں گھٹایا وی جا سکدا اے۔ انج کینسر تے ہور روگاں دے خلاف لڑائی جِتی جا سکدی اے۔ ہور چنگی خبر ایہ اے کہ ایہ ساریاں سوادی غذاواں نیں جہناں نوں تسیں روز دی خوراک وچ اسانی نال شامل کر سکدے او۔ سوائے نمبر 2 دے‘ جد کہ نمبر 4تے ہر کوئی سِپنا پسند کرے گا تے 9 نمبر تہانوں یاد کرائے گا کہ ماں ٹھیک ای کہندی سی۔

اومیگا فیٹی ایسڈ: اسیں اک صحت بخش غذا دا ذکر کراں گے جہڑی بہت سارے وسیلیاں توں مل جاندی اے۔ اومیگا۔3 نال بھرویں خوراک جو تیزابیت نال نبڑن پاروں جانی جاندی اے۔ کھوج توں پتا لگیا اے کہ ایکسٹرا ورجن زیتون دا تیل آرتھرائیٹس روگ دی ودھوتری نوں گھٹا کے جوڑاں دی سوج مکا دیندا اے۔ ایہناں پاروں درد ادھا یاں اک تہائی رہ جاندا اے۔اومیگا تھری سامن مچھی‘ ٹونا‘ ٹراؤٹ تے میکرل مچھی وچ ملدی اے۔ ایہ بیجاں‘ اخروٹ‘ اومیگا تھری والے انڈے تے ہر قسم دِیاں گریاں وچ وی ملدی اے۔ تسیں ایہناں راہیں پیڑ گھٹاون دے نال نال ہور وی ان گنت فایدے لے سکدے او۔

تھوم: تھوم‘ گنڈھے تے لیک (اک قسم دے گنڈھے) وچ انٹی آکسیڈنٹ ہوندے نیں۔ ایہناں وچ اک ہور ماداکورسٹین ہوندا اے جہدے پاروں ساڑ وچ ارام ملدا اے۔ خاص کر تھوم ایہدے وچ بہت اثر انگیز اے۔ تسیں کچے تھوم دیاں چار تُریاں یاں اوہدا پوڈر ورت سکدے او۔ جے کچا تھوم تہاڈا معدا اتھل پتھل کردا اے تاں تھوم دے کیپسول ورت سکدے او۔ تھوم کینسر دے خلاف وی لڑاکا اے تے ایہدے ورتن نال دل دے روگاں دا خطرا وی گھٹ جاندا اے۔

ٹارٹ چیری: کیہ تسیں ایسا پیون بھال رہے او جہدے نال تیزابیت نہ ودھے؟ تاں فیر چیری دا جوس پی ویکھو۔ چیتے رکھو کہ چیری دے جوس وچ چینی یاں بناوٹی مٹھاس پاروں ایہدے فایدے جاندے رہندے نیں۔

سبز چاہ: سبز چاہ‘ تیزابیت دے خلاف اک بہترین خوراک اے۔ ایہ تیزابیت ای نہیں گھتاندی سگوں جسم دے ہر حصے لئی فایدے مند اے۔ ایہ پیٹ دی چربی کھوردی اے‘ کینسر دا وی علاج اے تے ڈپریشن نوں وی گھٹاندی اے۔ ایہدے وچ کیفین وی بہتی نہیں ہوندی تے ایہنوں تیجے پہر یاں شام ویلے وی نیندر گھٹن دے خوف توں بغیر ورتیا جا سکدا اے۔ البتا ایہدے وچ چینی رلا کے ایہدے فایدے ختم نہ کرو۔

اناج تے پھَلیاں: اناج تے پھلیاں وی تیزابیت خلاف لڑدے نیں‘ جد کہ ایہناں دے ای کزن‘ سفید آٹا تے سفید چاول‘ تیزابیت نوں ودھاندے نیں۔ جوی دا دلیا تے براؤن چاول وچ ساڑن والے پروٹین یعنی سی آر پی (CRP)گھٹ ہوندے نیں۔ ایہو پروٹین تیزابیت‘ دل دے روگ‘ ذیابیطس تے جوڑاں دے درد دا کارن بندے نیں۔ ایہناں دا ریشا تہاڈِیاں آندراں نوں صحت مند رکھ کے تہانوں دل دے روگ‘ بلڈ پریشر توں بچاندی اے۔ ریشے نوں مکھن‘ پنیر تے ہورتیزابی غذاواں دے نال رلا کے نہ کھاؤ۔

ہلدی: ہلدی اک مسالا اے جہڑا پرانی تواریخ دے سمے توں ورتیا جا رہیا اے۔ ایہنوں دوائی دا درجا وی حاصل اے۔ ہلدی اینٹی آکسیڈنٹ وی اے تے تیزابیت مار وی۔ ہلدی نوں خالی کھانا چنگا نہیں لگدا۔ ایہدے نال کالی مرچ رلائی جا سکدی اے۔ ہلدی دی چاہ بنان لئی اک چمچا ہلدی وچ اُبلدا پانی پا کے دس منٹ پیا رہن دیو فیر ایہدے وچ اک ننبو دا رس تے تھوڑی جہی کالی مرچ پا کے پیو۔

بروکلی تے بند گوبھی:بروکلی تے بند گوبھی کھانا ہر اک نوں چنگا نہیں لگدا‘ پر ایہ دوویں بہت صحت بخش چیز نیں۔ ایہناں وچ اینٹی آکسیڈنٹ نیں جو فری ریڈیکلز توں بچاء کردیاں نیں۔ مختلف سٹر فرائی تے سلاد وچ بروکلی بہت اسانی نال شامل کیتی جا سکدی اے۔

ادرک: اک ہور مسالاادرک وی اے جہڑا تیزابیت ختم کردا اے۔ تسیں ایہنوں خوراک وچ ورتن دے نال نال ایہدی چاہ وی پی سکدے او یاں فیر ایہدا مربا وی ورتیا جا سکدا اے۔ اک ریسرچ توں پتا لگیا اے کہ آرتھرائیٹس دے روگیاں دے روگ وچ ادرک 63 فیصد تک گھاٹ لیا سکدی اے۔ روز دی دو گرام ادرک‘ پٹھیاں دی پیڑ گھٹا دیندی اے۔ جے تسیں بہتا کم کر لیا اے تاں ادرک دی چاہ تہانوں ارام دیوے گی۔۔ ادرک بلڈ شوگر نوں وی گھٹ کردی اے تے دل دے روگ توں وی بچاندی اے۔ ایہ اتھل پتھل معدے نوں وی ٹھیک کردی اے۔

یخنی: بروتھ یاں سیوری سوپ‘ جہڑے سبزیاں‘ مچھی‘ گوشت تے جڑی بوٹیاں نال تیار کیتے جاون‘ تیزابیت گھٹاندے نیں۔ تسیں سُنیا ہووے گا کہ چکن دی یخنی جسم تے روح دوہاں لئی فایدے بخش نیں۔ یخنی وایرس دے روگ جویں کہ نزلا‘ توں وی بچاء کردی اے۔ ایہدے وچ تھوڑی ادرک‘ پالک تے کھنبیاں وی پائیاں جا سکدیاں نیں۔ جدوں تسیں بیمار ہووو یاں سرجری دے بعد ٹھیک ہو رہے ہووو تاں یخنی بہترین غذا اے۔