kraamaat@gmail.com
+ +92 333-430-6384


پنجاب حکومت دی نا اہلی کارن پنجاب وچ ڈینگی قیامت ورھا رہیا اے: حمزہ شہباز ……٭رویل خبر٭


نمائندا رویل October 13, 2021


لاہور (نمایندا رویل)پنجاب اسمبلی وچ قائد حزب اختلاف حمزہ شہباز نے کہیااے کہ پنجاب حکومت نے اپنی نااہلی تے تساہل دی بدولت لوکائی دی جان نوں داء اُتے لا دِتا اے۔ ہسپتال ڈینگی روگیاں نال بھر چکے نیں۔ پنجاب وچ ڈینگی قیامت ورھا رہیا اے۔ صوبے بھر توں 4496 کیس رپورٹ ہو چکے نیں جہدے وچوں 3437 کیس صرف لاہور چوں نیں۔ اپنے بیان وچ اوہناں نے کہیا کہ شہباز شریف دور وچ جدوں ڈینگی نے سر چکیا سی تے وزیراعلا نے 90 میٹنگز آپ چیئر کیتیاں۔ روزانا دی بنیاد اُتے کارکردگی دی پڑتال ہوندی سی۔ سارے محکمیاں نوں متحرک کیتا۔ شہباز شریف دے ویلے سر اقدامات تے قائدانا صلاحیتاں پاروں پنجاب وچ ڈینگی وایرس اُتے قابو پا لیا گیا جہدا اعتراف سری لنکا‘ تھائی لینڈ تے انڈونیشیا دے ماہرین نے وی کیتا۔ چالو ورھے انسدادا ڈینگی مہم دا حکم اوس ویلے جاری ہویا جدوں موتاں ہونیاں شروع ہو گئیاں۔ ویلے سر اگاہی مہم وی نہیں شروع کیتی گئی۔ ڈینگی ہائی رسک علاقیاں وچ سپرے نہ ہون پاروں لاروے نوں پھلن پھُلن دا موقع ملیا۔ ایہدے وچ کوئی حیرت نہیں کہ نااہلی پاروں ڈینگی پنجاب تے خیبر پختونخوا وچ ای تباہی کھلار رہیا اے جتھے تحریک انصاف دی حکومت اے۔ شہباز شریف نے 14 موبایل ہسپتال فراہم کیتے تاں جے ڈینگی دے روگیاں نوں ویلے سر طبی امداد مہیا کیتی جا سکے۔ ایتھے فیلڈ ہسپتال اوس ویلے قایم کیتا گیا جدوں ہسپتال روگیاں نوں بیڈز دی کمی پاروں پرتان لگ پئے۔ ڈینگی دی وبا نال نبڑن دے بعد شہباز شریف دی ہدایت اُتے پی ڈی ایم اے نے اک کتاب شایع کیتی سی‘ اوہدے وچ وبا نال نبڑن لئی کامیاب حکومتی حکمت عملیاں تے طریقا کار درج کر دِتے سن۔ موجودا حکومت اوس کتاب توں ای لابھ لوے۔