kraamaat@gmail.com
+ +92 333-430-6384


پنجاب ہُن تک چین دے سرمایا کاراں لئی بہترین، ”وزیراعلا سرمایا کار سہولت سنٹر“ دا افتتاح……٭رویل خبر٭


نمائندا رویل October 15, 2021


لاہور (نمایندا رویل) وزیراعلا پنجاب سردار عثمان بزدار نے ملکی تے بدیسی سرمایا کاراں دی سہولت لئی ”وزیراعلا سرمایا کار سہولت سنٹر“ دا افتتاح کر دِتا اے۔ ایس سلسلے وچ 90 شاہراہ قائداعظم اُتے خصوصی تقریب دا انعقاد کیتا گیا۔ وزیراعلا عثمان بزدار نے سرمایا کاری سہولت سنٹر دی افتتاحی تقریب نال خطاب کردیاں ہویاں کہیا کہ اللہ تعالیٰ دے فضل و کرم نال پنجاب ہُن تک چین دے سرمایا کاراں لئی بہترین تے اولین انتخاب بن چکیا اے۔ 2018 توں ہُن تک 2 سالاں وچ چین دے سرمایا کار ڈیڈھ ارب ڈالر دی سرمایا کاری کر چکے نیں۔ چین دا سبھ توں وڈا گارمنٹس گرُپ ”چیلنج فیشن“ پنجاب وچ 15 کروڑ ڈار دی سرمایا کاری لیا رہیا اے۔ مقامی تے بدیسی سرمایا کاراں لئی پنجاب وچ سرمایا کاری کرن دے حوالے نال سہولتاں دین تے اسانیاں پیدا کرن لئی چیف منسٹر آفس دے تحت وزیراعلا سرمایا کاری سہولت سنٹر قایم کیتا اے تے ایہ سنٹر سرمایا کاری توں متعلقا امور دے حوالے نال سارے اقدامات فوری چکے گا تے کوئی سرخ فیتا سرمایا کاری دی راہ وچ حایل نہیں ہو سکے گا۔ سرمایاکاری سہولت سنٹر دے قیام نال سرمایا کاراں نوں متعلقا اداریاں دے اعلا سرکاری حکام تک براہ راست رسائی حاصل ہووے گی۔ بزنس دی پلاننگ توں پروجیکٹ دے اغاز تک حایل رکاوٹاں نوں اسانی نال دُور کیتا جا سکے گا۔ اوہناں نے کہیا کہ پنجاب نوں سرمایا کاری دے نویں دور وچ داخل کرن لئی اسیں "Zero NOC" دی پالیسی لیا رہے آں تے زیرو این او سی دی پالیسی نال تاجر‘ صنعت کار تے سرمایا کار باعزت طریقے نال اسانی نال نہ صرف کاروبار شروع کر سکن گے سگوں ایہنوں ترقی وی دے سکن گے۔ ایسے پالیسی دے تحت ”چیلنج فیشن“ نوں کاروبار لئی 2 ہفتے دی گھٹ مدت وچ این او سی جاری کر دِتا گیا اے۔ ساڈے ایس بزنس دوست اقدام نال 20 ہزار توں ودھ روزگار دے نویں مواقع پیدا ہو رہے نیں۔ وزیراعلا عثمان بزدار نے کہیا کہ پنجاب وچ مقامی صنعت تے تجارت دے فروغ لئی ذکر جوگ اقدامات کیتے جا رہے نیں۔ پنجاب وچ 7 دہاکیاں توں صرف 12 سیمنٹ پلانٹ سن۔ ساڈی حکومت نے 3 سالاں وچ 10 سیمنٹ پلانٹ لئی این او سی جاری کر دِتے نیں جد کہ ہور 10 سیمنٹ پلانٹ دی منظوری دا عمل تیزی نال جاری اے۔ ایسے طرحاں ساڈی حکومت توں پہلے پنجاب وچ صرف 2 سپیشل اکنامک زونز سن۔ اسیں 3 سالاں وچ 12 سپیشل اکنامک زونز اُتے کم شروع کیتا اے جد کہ 8 نویں سپیشل اکنامک زونز وچ انڈسٹریلایزیشن دا عمل شروع ہو چکیا اے۔ 4 انڈسٹریل سٹیٹس نوں اپ گریڈ کر کے سپیشل اکنامک زونز دا درجا دِتا جا رہیا اے۔ اوہناں نے کہیا کہ نوجواناں لئی رو زگار تے چھوٹے قرضیاں دی فراہمی لئی بینک آف پنجاب دے اشتراک نال 30 ارب رُپئے مالیت دے پنجاب روزگار پروگرام دا اغاز کر دِتا گیا اے۔ صوبے وچ زراعت تے لائیو سٹاک دے پوٹینشل نوں پوری طرحاں استعمال وچ لیان لئی کوشاں آں۔ چھوٹے کاشتکاراں نوں رعایتی قیمت اُتے جدید زرعی آلات فراہم کیتے جا رہے نیں۔ کاشتکاراں لئی کسان کارڈ دا اجراء کیتا گیا اے۔ اوہناں نے کہیا کہ پنجاب حکومت نومبر وچ دبئی ایکسپو وچ صوبے دی ثقافتی تے تجارتی ”شوکیسنگ“ کرے گی۔ دبئی ایکسپو وچ پنجاب دی ثقافت‘ تجارت‘ سیاحت تے درخشاں روایتاں دے لکے گوشے روشناس کرائے جان گے۔ دبئی ایکسپو وچ رلت دا مقصد دنیا ساہمنے پاکستان دا سوفٹ امیج لیانا اے۔ اوہناں نے کہیا کہ پنجاب انڈسٹریل سٹیٹس ڈویلپمنٹ اینڈ مینجمنٹ کمپنی (پیڈمک) تے فیصل آباد انڈسٹریل سٹیٹس ڈویلپمنٹ اینڈ مینجمنٹ کمپنی (فیڈمک) دے بورڈاں نوں مکمل طور اُتے فعال کیتا جا رہیا اے۔ پیڈمک تے فیڈمک دے فعال ہون نال سرمایا کاراں نوں بہتر ماحول تے ہور سہولتاں مہیا کیتیاں جا سکن گیاں۔ وزیراعظم عمران خان دے وژن مطابق صوبے وچ سرمایا کاری لئی بہترین ماحول فراہم کیتا گیا اے۔ آس اے کہ پنجاب حکومت دے ٹھوس اقدامات نال صوبے وچ سرمایا کاری نوں فروغ ملے گا تے معیشت مضبوط ہووے گی۔ وزیراعلا سرمایا کاری سہولت سنٹر دے قیام نال مقامی تے بدیسی سرمایا کار مستفید ہون گے۔ پنجاب صنعت تے تجارت دے نویں دور وچ داخل ہووے گا۔ وزیراعلا عثمان بزدار نے چیف ایگزیکٹو آفیسر ”چیلنج فیشن“ کیرن (Ms. Karen) نوں این او سی دا لیٹر وی دِتا۔