اسیں ایس ورھے 5 فیصد دی شرح نال ترقی کراں گے:وزیر خزانا شوکت ترین……٭رویل خبر٭

اسلام آباد (نیوز ڈیسک) وزیر خزانا شوکت ترین نے کہیا اے کہ 60 دے دہاکے وچ پاکستان ایشیاء دی چوتھی وڈی معیشت سی۔ وقت دے نال اسیں معیشت دی سمت گنوا دِتی۔ اسیں ملکی معیشت نال انصاف نہیں کیتا۔ وزیراعظم عمران خان نوں بھیڑی حالت وچ معیشت ملی‘ ساڈے قرضے غیر مستحکم سطح اُتے پہنچ گئے نیں۔ سانوں معیشت دی سمت نوں صحیح کرن لئی مشکل تے غیر مقبول فیصلے کرنے پئے۔ وزیر خزانا شوکت ترین دا واشنگٹن وچ امریکی ادارا برائے امن (USIP) وچ وچار وٹاندرا کردیاں ہویاں کہنا سی کہ آئی ایم ایف نال رجوع کرنا پیا۔ کرنسی دی قدر وچ گراوٹ کرنی پئی۔ کرونا دی وبا نے عالمی معیشت نوں وی متاثر کیتا۔ حکومت نے موثر انداز وچ کرونا وبا دا مقابلا کیتا۔ معاشی شرح نمو نوں منفی 0.5 فیصد توں 4.5 فیصد تے لے کے گئے۔ ساڈی 60 فیصد ابادی 30 سالاں توں گھٹ عمر اے۔اوہناں لئی روزگار دا بندوبست کرنا اے۔ شوکت ترین دا کہنا سی کہ اسیں زراعت‘ صنعت‘ درآمدات تے ہاؤسنگ وچ اصلاحات کیتیاں نیں۔ اسیں ایس ورھے 5 فیصد دی شرح نال ترقی کراں گے۔ مستحق طبقے نوں ترقی دے ثمرات اپڑاواں گے۔ پاکستان گوادر وچ قومانتری سرمایا کاری دا خیر مقدم کردا آں۔ اسیں پائیدار بنیاداں اُتے ترقی دے حصول لئی کوشاں آں۔ اسیں زراعت‘ گھرانیاں دی اُساری لئی سستے قرضے دے رہے آں۔ وزیر خزانا دا کہناسی کہ کمزور طبقے نوں صحت کارڈ جاری کر رہے آں۔ کامیاب پاکستان پروگرام راہیں 40 لکھ گھرانیاں نوں سستے قرضے دِتے جان گے۔ آئی ایم ایف نال قرضے دی چھیویں قسط میرے دورے دا سبھ توں اہم جزو اے۔ آئی ایم ایف نال ٹیکنیکل لیول مذاکرات مکمل کر لئے نیں۔ پاکستان نوں ہمیشا توں سیکیورٹی دے پرزم نال ویکھیا گیا۔ وزیراعظم نے کہیا کہ اسیں لوکاں نوں اقتصادی فلاح دے پرزم نال ویکھنا اے۔ وزیراعظم عمران خان نے ماضی دے حکمراناں دے مقابلے گوانڈھی مُلکاں دے زیادا دورے کیتے۔ ساڈے گوانڈھی ملکاں نال تعلقات پہلے توں ودھ مضبوط ہوئے نیں۔ پاکستان تے بھارت وچکار کشمیر اک بنیادی مسئلا اے۔ اسیں اقوام متحدا دیاں قرار داداں دے تحت سمجھدے آں کہ کشمیر اک متنازعا علاقااے۔ شوکت ترین دا کہنا سی کہ طالبان کول کیش دی کمی اے۔ جے قومانتری برادری نے مدد نہ کیتی تے افغانستان وچ بحران پیدا ہو سکدا اے۔ ایہدے نال پاکستان سبھ توں ودھ متاثر ہووے گا۔ قومانتری برادری نوں افغانستان دی مدد کرنی چاہیدی اے۔ اسیں معیشت وچ میرٹ دی بالادستی لیا رہے آں۔ وزارتاں وچ نجی شعبے توں ماہرین لیا رہے آں۔ بیوروکریسی دی کارکردگی نوں ودھا رہے آں۔ ٹیکس اصلاحات کیتیاں جا رہیاں نیں۔