ایہو جہی نوبت کیوں آئے لوک دھیاں پیدا نہ ہون دیاں دُعاواں منگن،رابی بہاولپور دے مظلوم خاندان دی اواز بن گئے……٭رویل خبر٭

لاہور (نمایندا رویل) شوبز نُوں خیر باد کَہ کے فلاحی سرگرمیاں کرن والی رابی پیرزادا بہاولپور دے مظلوم خاندان دی اواز بن گئے‘ اداکارا نے وزیراعظم عمران خان‘ وزیر اعلا عثمان بزدار تے آئی جی پنجاب راؤ سردار علی خان توں اپیل کردیاں ہویاں کہیا اے کہ پولیس ظالماں دے نال رَل گئی اے‘ مظلوم خاندان دی دھی نُوں لبھ کے دِتا جاوے‘ ایہو جہی نوبت کیوں آئے کہ لوک دھیاں پیدا نہ ہون دیاں دُعاواں منگن۔ مظلوم خاندان دی رو داد اُتے مبنی ویڈیو سوشل میڈیا اُتے جاری کردیاں ہویاں رابی پیرزادا نے کہیا کہ ایہ خاندان بہاولپور توں میر ے کو ل آیا اے تے ایہنے اپنے نال ہون والے ظلم دی کہانی دَسی اے۔ تھانا صدر بہاولپور دی پولیس نے مقدمے دے اندراج لئی 60 ہزار رُپئے لئے تے پُٹھا متاثرا خاندان نُوں ہراساں کیتا جا رہیا اے‘ سُنیا جا سکدا اے کہ ماپے کسویں رو رو کے دُہائیاں دے رہے نیں۔