پنجابی پڑھاؤ سیمینار تے ریلی وچ  پنجابی زبان دے حق لئی نعرے ،وڈی گنتی وچ پنجابیاں دی رَلت۔۔۔۔٭رویل خبر٭

لاہور(نمایندا رویل ) 16 اکتوبر 2021 نوں لاہور دے پریس کلب وچ پنجابی پڑھاؤ سیمینار دا پربندھ کیتا گیا جہدے وچ ساریاں ای پنجابی تنظیماں نے اپنا حصا پایا۔ایس سیمینار وچ وڈی تعداد اندر پنجابی لکھاریاں تے شاعراں نے اپنے وچار سانجھے کیتے ایس توں وکھ سیاستداناں نے وی پنجابی زبان دے حقاں لئی اکمٹھ ہو کے جتن کرن دی گل کیتی سیاست داناں وچ مطلوب وڑائچ،حسان خاور،فیصل رضا میر نے اپنے وچار سانجھے کیتے۔ایس سیمینار دے بلار دے طور تے افضل ساحر تے علی عثمان باجوہ ہوریں سن ۔الیاس گھمن ہوراں نے سیمینار دے اخیر تے اک قراداد پاس کروائی جس نوں سبھ رلتیاں نے اتفاق نال پاس کیتا ایس توں مگروں پریس کلب دے باہر رَوس وکھالا تے ریلی کڈھی گئی جس وچ جیون دے ہر کھیتر نال سنبندھت لوکائی نے پنجابی زبان نال اپنا مَوہ وکھایا ۔ گوہ گوچر گل ایہ اے کہ ایس ریلی دی خبر کسے وی اردو الیکٹرانک میڈیا نے نہ چلائی جد کہ ایس ریلی دے بلکل ساہمنے سڑک دے دوجے پاسے اک سیاسی تنظیم دا مہنگائی دے خلاف وکھالے نوں وار وار وکھایا جاندا رہیا اے ایہ سبھ سلوک پنجابیاں نوں کافی کجھ سوچن دی پریرنا دیندا رہندا اے۔