لوکائی دا کہنا اے کہ اسیں مرگئے آں‘ ایس جعلی حکومت توں جان چھڈاؤ: مریم نواز ……٭رویل خبر٭

لاہور (نیوز ڈیسک) پاکستان مسلم لیگ (ن) دی نائب صدر مریم نواز نے کہیا اے کہ اسیں نازک ویلے وچ داخل ہورہے آں‘ سانوں اپنی پارٹی لئی نہیں ملک لئی اگے ودھنا پوے گا تے ہُن اسیں فیصلا کن مرحلے وچ داخل ہو رہے آں۔ حویلیاں وچ مسلم لیگ (ن) سوشل میڈیا کنونشن نال خطاب کردیاں ہویاں مرکزی نائب صدر مریم نواز سریف نے وڈیو لنک راہیں خطاب کردیاں ہویاں کہیا کہ ووٹ نُوں ردّی دے ٹکڑے وانگوں مِدھ دِتا جاندا اے‘ شاید 74 سال وچ مہنگائی اینی نہیں ہووے گی جنی اج اے‘ نواز شریف دے دور وچ کہیا جاندا سی کہ جدوں پٹرول‘ بجلی مہنگی ہوندی اے تے وزیراعظم چور ہوندا اے جد کہ نواز شریف تے چور نہیں نکلے۔ مریم نواز دا ہور کہنا سی کہ نواز شریف دے دور وچ غریب توں غریب وی ڈِھڈ بھر کے سوندا سی‘ مہنگائی وچ حکومتی نا اہلی دا عمل دخل تے ہے ای‘ ووٹ دی عزت پامال کرن دا وی نتیجا اے جد کہ جدوں اسیں ووٹ نُوں عزت دوان دی گل کیتی تے مخالفین نے ساڈے اُتے تنقید کیتی‘ ایہ تے اپنی گل کر رہے نیں۔ اوہناں نے کہیا کہ جدوں ووٹ نُوں عزت نہیں ملدی تے ایہو جہے حکمران مسلط کر دِتے جاندے نیں جہناں نُوں صرف اپنی کرسی دی فکر ہوندی اے‘ فیصل آباد واپسی اُتے میں اِک سٹور اُتے گئی تے لوکائی مینوں ملی‘ لوکائی دا کہنا سی کہ رب دا واسطا جے ساڈی ایس حکومت توں جان چھڈاؤ‘ لوکائی دا کہنا اے کہ اسیں مرگئے آں‘ ایس جعلی حکومت توں جان چھڈاؤ۔ کنونشن نال خطاب کردیاں ہویاں اوہناں نے کہیا کہ مسلم لیگ ن دی سوشل میڈیا ٹیم نے اپنا بھرواں کردار ادا کیتا‘ لوکائی مہنگائی دے کارن رُل گئی‘ خُدکشیاں اُتے مجبور ہو گئی جد کہ حکمراناں نُوں صرف ایس گل دی پرواہ اے کہ اپنی حکومت نُوں کویں بچانا اے۔