اپوزیشن جماعتاں دے ایکا،مہنگائی خلاف پورے ملک وچ تحریک تے احتجاجی مظاہریاں دا اعلان……٭رویل خبر٭

لاہور / اسلام آباد (نیوز ڈیسک) اپوزیشن جماعتاں دے ایکے پی ڈی ایم نے حالیا مہنگائی دے خلاف پورے ملک وچ تحریک تے احتجاجی مظاہریاں دا اعلان کر دِتا۔ جمعیت علماء اسلام (ف) تے پی ڈی ایم دے آگو مولانا فضل الرحمان نے شاہد خاقان عباسی تے محمود خان اچکزئی دے نال پریس کانفرنس کردیاں ہویاں کہیا کہ اج ہنگامی طور اُتے پریس کانفرنس دا انعقاد کیتا گیا‘ پی ڈی ایم وچ شامل آگوواں دے مشورے نال بیان جاری کیتا جا رہیا اے‘ پی ڈی ایم دے مؤثر اقدام دی ضرورت سی۔ مولانا فضلا لرحمان نے کہیا کہ پورے ملک توں عام بندے دی چیک و پکار اسمان نُوں ہتھ لا رہی اے‘ آئے دن مہنگائی بمب سُٹے جا رہ ینیں‘ عام بندا خُد کشی اُتے مجبور ہو گیا اے‘ اسیں اگلے 2 ہفتیاں لئی ملک وچ مظاہریاں دا اعلان کر رہے آں‘ 12 ربیع الاول دیاں تقریباں توں فارغ ہون دے بعد ہر ضلعی ہیڈ کوارٹر ز توں مظاہرے کیتے جان گے۔ پاکستان ڈیمو کریٹک موومنٹ (پی ڈی ایم) دے آگو مولانا فضل الرحمان نے کہیا اے کہ پورے ملک وچ 2 ہفتیاں لئی مظاہرے دا اعلان کردے آں‘ ہر ضلعی ہیڈ کوارٹرز وچ مظاہرے کیتے جان گے‘ غریب بندا خُد کشیاں اُتے مجبور اے جد کہ مہنگائی دے خلاف پورے ملک وچ تحریک چلاواں گے۔ میڈیا نال گلبات کردیاں ہویاں اوہناں نے کہیا کہ آئے دن مہنگائی دے بمب سُٹے جا رہے نیں‘ مہنگائی دے خلاف ملک گیر تحریک چلائی جاوے گی‘ پہلا مرحلا مکمل ہون اُتے پی ڈی ایم اگے دے لائحے عمل دا اعلان کرے گی۔ آگو پی ڈی ایم نے کہیا کہ پی ڈی ایم دیاں صوبائی تے ضلعی تنظیماں نُوں کہیا گیا اے کہ ہر شعبا زندگی نال وابستا بندیاں نال رابطا کرن‘ لوکائی توں اپیل کردے آں کہ مہنگائی دے ایس طوفان دا مقابلا کرن لئی گھراں توں نکلن‘ پی ڈی ایم ہر محاذ اُتے لڑن لئی تیار اے‘ اسیں ایہو جہے حکمراناں نُوں جہڑے قوم لئی عذاب نیں نُوں ہور مسلط نہیں ہون دینا چاہندے۔ اوہناں نے کہیا کہ ملکی قرضے 25 ہزار توں ودھ کے 45 ہزار ہو گئے نیں‘ معاشی شرح نمو 5.8 فیصد توں زیرو ہو گئی‘ کرپٹ جعلی حکمراناں نُوں قوم اُتے مسلط ہون دا حق نہیں‘ لوکائی پٹرولیم مصنوعات دے بھار ہیٹھ دَب گئی اے‘ 15 جون توں ہُن تک 30 رُپئے 70 پیسے پٹرول مہنگا کیتا گیا‘ حکومت ملک تے قوم دے مفادات دے تحفظ دی بجائے آئی ایم ایف دی چوکیدار بن گئی اے‘ قوم دی قیادت غلامانا ذہنیت دے لوکاں دے کول اے۔ مولانا فضل الرحمان نے کہیا کہ حکومت نے ملک نُوں آئی ایم ایف دی چراگاہ بنا دِتا اے۔ پی ڈی ایم کَہ چکی ا یکہ سلیکٹڈ نا اہل تے نالایق حکومت ناکام ہو چکی‘ ایہ کرپٹ ترین حکومت اے‘ کون ذمے دار سلیکٹڈ یاں سلیکٹرز؟۔ پریس کانفرنس دے دوران اوہناں توں اِک صحافی نے سوال کیتا کہ وزیراعظم عمران خان دی سول اُچیرتا دی تحریک دی دعوت اُتے ساتھ دوو گے؟ ایہدے جواب وچ مولانا فضل الرحمان نے کہیا کہ میں تہاڈے سوال وچ عمران خان نُوں وزیراعظم کہن اُتے احتجاج کردا آں‘ اسیں عمران خان دا کسے قسم دا ساتھ نہیں دواں گے۔ ایس توں پہلاں صدر پاکستان مسلم لیگ (ن) شہباز شریف تے آگو پی ڈی ایم مولانا فضل الرحمان دے وچکار ٹیلی فون اُتے رابطا ہویا اے جہدے وچ ملک دی موجودا صورتحال خاص طور اُتے مہنگائی وچ انھے وادھے دے حوالے توں وچار وٹاندرا کیتا گیا تے مہنگائی دے خلاف تحریک چلان دا فیصلا کیتا گیا اے۔ وسیلیاں دے مطابق پاکستان مسلم لیگ (ن دے قائد محمد نواز شریف نال وی پارٹی صدر تے قائد حزب اختلاف شہباز شریف نے ٹیلی فون اُتے مشاورت کیتی اے۔ مسلم لیگ (ن) دے قائد نواز شریف نے ملک وچ بدترین مہنگائی دے خلاف بھرویں تحریک چلان دے فیصلے دی توثیق کر دِتی اے۔ قائدین نے ملک دیاں ہور اپوزیشن جماعتاں دے نال رَل کے حکومت دے خلاف احتجاجی تحریک چلان اُتے اتفاق کیتا اے۔ آگوواں نے اتفاق کیتا اے کہ قو م نُوں مہنگائی‘ بیروزگاری تے معاشی تباہی توں نجات دلوان لئی گھراں توں نکلنا پوے گا‘ پورے ملک وچ احتجاج‘ احتجاجی ریلیاں تے مارچ ہون گے۔