حکومت جِنی دیر رہوے گی معیشت ہور تباہ ہووے گی: شہباز شریف……٭رویل خبر٭

لاہور (نمایندا رویل) قومی اسمبلی وچ اپوزیشن لیڈر شہباز شریف نے کہیا اے کہ پی ٹی آئی دی حکومت ناکام ہو چکی اے۔ ایہ حکومت جِنی دیر رہوے گی معیشت ہور تباہ ہو جاوے گی۔ لاہور دی احتساب عدالت دے باہر آشیانا ہاؤسنگ سکیم‘ رمضان شوگر ملز تے منی لانڈرنگ ریفرنسز دی سنوائی توں پہلے صحافیاں نال گل بات کردیاں ہویاں حمزہ شہباز نے کہیا کہ عام بندے دے گھر فاقیاں نے ڈیرے لائے ہوئے نیں‘ لوکائی نال سڑکاں اُتے نکلاں گے‘ حکومت دا محاسبا کراں گے۔ حمزہ شہباز نے کہیا کہ دوائیاں لوکائی دی پہنچ توں دُور ہو گئیاں نیں‘ آئی ایم ایف نے کہ دِتا اے کہ لک توڑ مہنگائی دے باوجود نویں ٹیکس لاؤ۔ اوہناں نے کہیا کہ اسیں دن رات لا کے لاہور چوں ڈینگی دا خاتما کیتاسی‘ ہُن ایہدے نال لوک فوت ہو رہے نیں۔ ایہ لوک ویلے سر سپرے وی نہ کرا سکے‘ بے حسی اے‘ دن رات جھوٹھ بولدے نیں۔ حمزہ شہباز دا ہور کہنا سی کہ ہمیشا کہیا اے معیشت وینٹی لیٹر اُتے اے۔ شہباز شریف نے کہیا کہ پی ٹی آئی دی حکومت ناکام ہو چکی اے‘ ایہ حکومت جِنی دیر رہوے گی معیشت ہور تباہ ہو جاوے گی۔