ڈالر دی اُچی اُڈاری‘ ڈالر ہور 2.06 مہنگا‘ 173 رُپئے توں ودھ گیا……٭رویل خبر٭

کراچی (نمایندا رویل) ملکی تواریخ وچ پہلی وار ڈالر دی قیمت 173 رُپئے توں ودھ گئی۔ ڈالر دی ودھدی ہوئی ڈیمانڈ‘ خام دی عالمی قیمت وچ وادھے نال درآمدی بِل تے مہنگائی وچ ہور وادھے ورگے عوامل پاروں انٹر بینک مارکیٹ وچ کاروباری ہفتے دے پہلے دن ڈالر دی اُڈان جاری اے۔ ڈالر دی انٹر بینک قیمت 173 رُپئے توں وی ودھ گئی اے تے انٹر بینک مارکیٹ وچ ڈالر دی قدر ہور 2.06 رُپئے دے وادھے نال ملکی تاریخ وچ پہلی وار ڈالر دی قیمت 173.24 رُپئے نال تواریخ دی نویں سبھ توں اُچی سطح اُتے پہنچ گئی۔ ماہرین دا کہنا اے کہ قومانتری سطح اُتے خام تیل سنے ہور اہم کموڈٹیز دیاں ودھدیاں ہویاں قیمتاں نال پاکستان دے نہ صرف درآمدی بل دے حجم وچ نمایاں وادھے دے خطرے نیں سگوں مہنگائی دی شرح وچ وی وادھے دے خدشے نیں جہدے نال انٹر بینک مارکیٹ وچ درآمدی ضرورتاں لئی ڈالر دی طلب ودھدی جا رہی اے تے ڈالر دی قدر سنبھل نہیں رہی۔ دووجے پاسے سٹیٹ بینک دے نویں اقدامات تے ایکسچینج کمپنیاں اُتے چھاپیاں دا سلسلا جاری اے جہدے نتیجے وچ اوپن مارکیٹ توں افغانستان نوں ڈالر دی سمگلنگ اُتے کافی حد تک قابو پا لیا گیا اے پر ایس کریک ڈاؤن دے مطلوبا اثرات انٹر بینک مارکیٹ وچ نظر نہیں آرہے۔