حکومت دے آئی ایم ایف نال مذاکرات غیر شفاف نیں: شیری رحمان……٭رویل خبر٭

اسلام آباد (نیوز ڈیسک) پاکستان پیپلز پارٹی دی نایب صدر سینیٹر شیری رحمان نے پی ٹی آئی ایم ایف مذاکرات اُتے تشویش دا اظہار کردیاں ہویاں کہیا اے کہ حکومت دے آئی ایم ایف نال مذاکرات غیر شفاف نیں۔ حکومت نے پارلیمان نوں نہیں دسیا کہ آئی ایم ایف نال کیہ معاہدے کرن جا رہے نیں‘ غیر شفاف معاہدے دے ملک تے لوکائی اُتے دُور رس اثرات مرتب ہون گے۔ کسے نوں پتا نہیں ایہ پاکستان دے مستقبل دا کیہ سودا کرن جا رہے نیں۔ شیری رحمان نے کہیا کہ چیئرمین بلاول بھٹو نے بلکل صحیح کہیا اے کہ ایس حکومت دی اُلٹی گنتی شروع ہو چکی اے۔ مذاکرات توں پہلے ای آئی ایم ایف دیاں شرطاں منن دے باوجود وی حکومت اجے تک کوئی معاہدا نہیں کر سکی۔ لوکائی اُتے بجلی تے پٹرول بمب سُٹ کے کہندے نیں مذاکرات دا کوئی ٹایم فریم نہیں اے۔