وزیراعظم تے آرمی چیف دا این سی او سی دا دورا،صوبیاں تے ہور اداریاں دیاں کرونا وبا توں بچاء لئی جَتن دی تعریف   ……٭رویل خبر٭

اسلام آباد (نیوز ڈیسک) وزیراعظم عمران خان تے آرمی چیف جنرل قمر جاوید باجوا نے پیر نوں این سی او سی دا دورا کیتا جتھے ڈی جی این سی او سی میجر جنرل آصف محمود گورائیا نے وزیراعظم تے آرمی چیف نوں کرونا دی تازا ترین صورت حال اُتے بریفنگ دِتی۔ اوہناں نے کرونا وبا دے سدباب‘ ویکسین دی فراہمی دے انتظامی ا مور تے مینجمنٹ سٹرٹیجیز اُتے وی روشنی پائی۔ وزیراعظم نے کرونا وبا دی روک تھام لئی این سی او سی دیاں کوششاں نوں سلاہیا۔ وزیراعظم نے صوبیاں تے ہور اداریاں دیاں کرونا وبا توں بچاء لئی کوششاں دی وی تعریف کیتی۔ وزیراعظم نے ویکسینیشن دے لازمی عمل دی تکمیل لئی سارے فریقاں نوں بھرپور تے مکمل اقدامات چکن دی ہدایت کیتی۔ بعد وچ وزیراعظم نے لیفٹیننٹ جنرل حمود الزمان خان دی ریٹایرمنٹ اُتے اوہناں نوں این سی او سی دا مومنٹو پیش کیتا۔ وزیراعظم نے لیفٹیننٹ جنرل حمود الزمان دی وسایل دے بہترین استعمال‘ مثالی کوآرڈینیشن‘ انتھک کوششاں تے خدمتاں دی تعریف کیتی۔