ملکہ ترنم نور جہاں اُتے علی عظمت دی تنقید، پرستاراں دا غم تے غصے دا وکھالا……٭رویل خبر٭

لاہور(شوبز نیوز)گلوکارعلی عظمت ملکہ ترنم میڈم نورجہاں دی ظاہری شخصیت بارے نامناسب الفاظ استعمال کر کے تنقیددی زَد وچ آ گئے۔ اِک انٹرویو وچ علی عظمت نےمُڈھلے دناں دیاں یاداں تازاں کیتیاں کہ کس طرحاں ایم ٹی وی دا اجارا سی جہنوں گلوکارا نے ثقافتی یلغار کہیا۔ علی عظمت دے مطابق کئی لوکاں ولوں غیر ملکی ثقافت دے پچھے جاندی وجھا ایہ سی کہ سانوں اپنے معاشرے وچ ایس طرحاں دی شے کوئی فراہم نہیں کردا سی۔ گلوکار علی عظمت نے ملکہ ترنم نور جہا ں لئی مائی دا لفظ استعمال کردیاں ہویاں کہیا کہ ٹی وی لاؤ تے اوہی وکھائی دیندے سن۔ تبدیل ہوندی پاکستان میوزک انڈسٹری اُتے گل کردیاں ہویاں علی عظمت نے مونہ پھَٹ انداز وچ کہیا کہ میرے بچپن وچ نور جہاں ساڑھی دے نال وڈے وڈے کانٹے‘ اوور میک اپ کر کے گانے گاندے سن تے اوس ویلے سانوں ایہناں توں چڑ چڑھدی سی۔