قانون ہتھ وچ لین والیاں نُوں گرفتار کراں گے جد کہ ہٹک جماعت دے کارکناں نُوں اسلام آباد جان توں روکاں گے: سی سی پی او لاہور ……٭رویل خبر٭

لاہور (نیوز ڈیسک)ہٹک جماعت دے احتجاج دے کارن لاہور وچ سڑکاں بلاک ہو گئیاں جد کہ مخصوص علاقیاں وچ موبائل تے انٹرنیٹ سروس بند ہون نال شہریاں نُوں ڈاڈھیاں اوکڑاں دا ساہمنا کرنا پے رہیا اے‘ احتجاج دے دوران ڈیوٹی کردیاں ہویاں 2 پولیس اہلکار حادثے وچ شہید ہو گئے۔ اہلکاراں نُوں زخمی حالت وچ ہسپتال منتقل کیتا گیا پر اوہ بچ نہ سکے۔ لاہو ر وچ کالعدم جماعت ولوں احتجاج دے کارن انٹرنیٹ تے ٹریفک دی آوا جائی بُری طرحاں متاثر اے جد کہ 6 تھاواں اُتے انٹرنیٹ سروس معطل اے جہناں وچ سمن آباد‘ سبزا زار‘ شیرا کوٹ‘ نواں کوٹ‘ اقبا ل ٹاؤن‘ گلشن راوی دے علاقے شامل نیں۔ بابو صابو توں سکیم‘ سکیم موڑ توں یتیم خانا ٹریفک لئی بند نیں جہدی وجھا توں شہریاں نُوں ڈاڈھیاں اوکڑاں دا ساہمنا کرنا پے رہیا اے۔ سی سی پی او لاہور غلام محمود ڈوگر نے کہیا کہ کسے نُوں وی قانون ہتھ وچ نہیں لین دواں گے تے قانون ہتھ وچ لین والیاں نُوں گرفتار کراں گے جد کہ ہٹک جماعت دے کارکناں نُوں اسلام آباد جان توں روکاں گے۔ دوجے پاسےہٹک تنظیم دے احتجاج دے معاملے اُتے جڑواں شہراں دی پولیس نے فیض آباد انٹرچینج نُوں چاراں پاسیوں بلاک کر دِتا اے تے کنٹینراں دے دوہاں پاسے مٹی دے ڈھیر لا دِتے گئے نیں جد کہ پولیس دے 4500 توں ودھ اہلکار تعینات کر دِتے گئے نیں۔ ایس توں وکھ وزیر اعلا پنجاب عثمان بزدار نے کالعدم تنظیم نال مذاکرات لئی پنجاب کابینا دے سینئر اراکین دی کمیٹی تشکیل دے دِتی اے۔ وزیر اعلا عثمان بزدار نے کالعدم تنظیم نال مذاکرات لئی کمیٹی بنان دا اعلان کردیاں ہویاں کہیا کہ کمیٹی وچ راجا بشارت تے چودھری ظہیر الدین شامل نیں۔ عثمان بزدار نے کہیا کہ حضور اکرمؐ دی سنت دے مطابق ملک وچ امن و امان لئی سانوں ساریاں نُوں رَل کے کم کرن دی ضرورت اے۔