حکومت نے ہر تھاں میرٹ اُتے تقرر ی کیتی،  ادارے بہتر ہونا شروع ہوئے نیں،مہنگائی مطابق تنخاہواں وچ وادھا نہیں ہویا :فواد چودھری……٭رویل خبر٭

اسلام آباد (نیوز ڈیسک) وفاقی وزیر اطلاعات فواد چودھری نے کہیا اے کہ پاکستان تحریک انصاف دی حکومت نے ہر جگھا میرٹ اُتے تقرر دی کوشش کیتی اے جس پاروں ادارے بہتر ہونا شروع ہوئے نیں۔ جدوں ادارے اپنے پیراں اُتے کھڑے ہون گے تے ملک تے اوہدی لوکائی خُشحال ہون گے۔ پاکستان ٹیلی وژن سی بی اے دے نویں منتخب نمایندیاں دی تقریب حلف برداری نال خطاب کردیاں ہویاں فواد چودھری نے کہیا کہ اسیں چیزاں باہروں منگوا رہے آں تے جدوں چیزاں زیادا مہنگیاں ہون گیاں تے ظاہر اے کہ سانوں اوہدی قیمت ودھ دینی پوے گی۔ اوہناں نے کہیا کہ جے ساڈے کول پیسے ہون تے اسیں لوکاں نوں سبسڈی دے سکیے تے اسیں لوکاں نوں بچا سکدے آں پر اِنج نہیں اے۔ اوہناں دا کہنا سی کہ 1947 توں 2006 تک پاکستان نے کُل قرضا 6 ہزار ارب رُپئے دا لیا سی۔ ایہدے وچ اسیں موٹر وے بنا لئیاں‘ گوادر شہر خرید لیا‘ اسلام آباد دا شہر بنا لیا‘ پاکستان دی فوج‘ فضائیا تے بحریا کھڑی کر لئی‘ اسیں سارے ادارے ایہناں 6 ہزار ارب رُپئے وچ ای بنا لئے۔ فواد چودھری نے کہیا کہ 2008 وچ جدوں صدر آصف علی زرداری صدر بنے تے 2018 وچ جدوں مسلم لیگ (ن) دی حکومت گئی تے اوہناں 10 ورھیاں وچ اسیں 23 ہزار ارب رُپئے دا قرضا لیا‘ ایہدی وجھا توں پچھلے ورھے اسیں 10 ارب ڈالر واپس کیتے‘ ایس ورھے سانوں 12 ارب ڈالر واپس کرنے نیں۔ اوہناں نے کہیا کہ ملکاں وچ جے اخراجات زیادا ہون تے آمدن گھٹ ہووے تے ملک غریب ہووے گا تے جے اخراجات گھٹ ہون تے اخراجات زیادا ہون تے تسیں خُشحال ہوو گے پر جدوں 10 ارب ڈالر پچھلے ورھے دے دِتے‘ 12 ارب ڈالر ایس ورھے دے رہے آں تے لوکائی نوں ریلیف کویں دیواں گے‘ ایہ اوہ چیلنج اے جہدا حکومت ایس ویلے ساہمنا کر رہی اے۔ اوہناں دا کہنا سی کہ ماضی دِیاں حکومتاں وچ جس طرحاں اداریاں دا بیڑا غرق کیتا گیا‘ پی ٹی وی‘ سٹیل مل‘ ریڈیو سنے سارے ادارے تنزلی دا شکار ہوئے۔ اسیں آکے 88 دے لاگے چیف ایگزیکٹو افسر لائے نیں تے اک وی تقرر میرٹ توں ہٹ نے نہیں کیتا۔ ہر جگھا میرٹ اُتے تقرر دی کوشش کیتی اے جہدی وجھا توں ادارے بہتر ہونا شروع ہوئے نیں۔ وزیر اطلاعات نے ہور کہیا کہ جدوں ادارے اپنے پیراں اُتے کھڑے ہون گے تے ملک تے اوہدی لوکائی خُشحال ہون گے۔ ایہ نہیں ہو سکدا کہ ادارے تنزلی دا شکار ہون تے اوہدے لوک خُشحال ہون ایس لئی پی ٹی وی ترقی کرے گا تاں ای پی ٹی وی دے لوک خُشحال ہون گے تے پی ٹی وی دے لوکاں دی وجھا توں ای ادارا اُتے جا سکدا اے۔ اوہناں نے کہیا کہ مہنگائی مطابق تنخاہواں وچ وادھا نہیں ہویا۔ اوہناں دا کہنا سی کہ کرونا پاروں عالمی سطح اُتے مہنگائی وچ وادھا ہویا تے عالمی معیشت نوں دھچکا لگیا۔