قومی سلامتی کمیٹی دا اجلاس طلب،ہٹک جماعت دے احتجاج توں متعلق کابینا دے فیصلیاں اُتے بریفنگ دِتی جاوے گی ……٭رویل خبر٭

اسلام آباد (نیوز ڈیسک) وزیراعظم عمران خان نے کالعدم جماعت دے احتجاج دے بعد دی صورت حال دے پیش نظر قومی سلامتی کمیٹی دا اجلاس اج (جمعے نوں) طلب کر لیا۔ وفاقی وزیر اطلاعات فواد چودھری نے سماجی رابطے دی ویب سایٹ ٹویٹر اُتے لکھیا کہ کالعدم جماعت دِیاں غیر قانونی سرگرمیاں نال پیدا ہون والی صورت حال دے پیش نظر وزیراعظم عمران خان نے قومی سلامتی کمیٹی دا اجلاس طلب کیتا اے۔ ٹویٹر اُتے اوہناں نے لکھیا کہ ایس اجلاس وچ قومی سلامتی توں متعلق ہور امور وی غور ہیٹھ آن گے۔وسیلیاں مطابق وزیراعظم عمران خان دی صدارت ہیٹھ قومی سلامتی کمیٹی دا اجلاس اج (جمعے نوں) 12 وجے ہووے گا۔ ہتھیار بند فوجاں دے آگو اجلاس وچ شریک ہون گے۔ ڈی جی آئی ایس آئی‘ ڈی جی آئی بی وی شریک ہون گے۔ وفاقی وزیر وی قومی سلامتی کمیٹی اجلاس وچ رلت کرن گے۔ وسیلیاں مطابق وزیر داخلا شیخ رشید تے وزیر نور الحق اجلاس نوں بریفنگ دین گے۔ وزیر داخلا موجودا صورت حال اُتے قومی سلامتی کمیٹی نوں اعتماد وچ لین گے۔ احتجاجی مظاہرین نال نبڑن دی حکمت عملی اُتے غور کیتا جاوے گا۔ کالعدم تنظیم دیاں غیر قانونی سرگرمیاں توں متعلق بریفنگ دِتی جاوے گی۔ کالعدم تنظیم دے احتجاج توں متعلق کابینا دے فیصلیاں اُتے بریفنگ دِتی جاوے گی‘ قومی سلامتی توں متعلق ہور امور اُتے وی غور کیتا جاوے گا۔ ایس توں وکھ وزیراعظم دی صدارت ہیٹھ رحمت اللعالمین اتھارٹی اُتے ٹوراکاری دا جایزا اجلاس منعقد ہویا۔ اجلاس وچ وفاقی وزیراں پیر نور الحق قادری‘ شفقت محمود‘ ڈاکٹر انیس احمد‘ صاحبزادا سلطان احمد علی تے پروفیسر اعجاز اکرم نے رلت کیتی۔ اجلاس نوں رحمت اللعالمین اتھارٹی اُتے ٹوراکاری توں اگاہ کیتا گیا۔ اجلاس نوں بریفنگ وچ دسیا گیا کہ اتھارٹی دا آرڈیننس جاری ہو چکیا اے۔ 6 ممبراں اُتے مشتمل بورڈ دی صدارت وزیراعظم آپ کرن گے۔ بورڈ ممبراں وچ مقامی تے قومانتری سطح دے محقق شامل ہون گے۔ وزیراعظم نے ہدایت کیتی کہ ممبراں دی تقرری وچ میرٹ دا خیال رکھیا جاوے۔ اسلامی خاندانی نظام تے اوہدے معاشرے اُتے مثبت اثرات اُتے وی تحقیق ہونی چاہیدی اے۔ بریفنگ وچ ہور دسیا گیا کہ اتھارٹی نوجواناں دیاں ودھدیاں ہویاں معاشرتی تے اخلاقی برائیاں جویں کہ منشیات دے استعمال توں روکن وچ وی معاون ثابت ہووے گی۔ ایس موقعے اُتے وزیراعظم دا کہنا سی کہ اتھارٹی سکول‘ کالج‘ یونیورسٹی‘ میڈیا تے قومانتری سطح اُتے تحقیق راہیں سیرت طیبہ دے پہلوواں دے عملی زندگی وچ اطلاق نوں یقینی بنان وچ معاون ثابت ہووے گی۔ نشری مواد جویں کہ ڈرامے‘ کارٹون تے فلماں بنائیاں جان گیاں جہناں دا مقصد اپنے کلچر تے تواریخ بارے نوجوان نسل نوں اگاہی دینا ہووے گا۔ وزیراعظم نے کہیا سیرت طبیہ اُتے ملک وچ وڈے پیمانے اُتے کم ہو رہیا اے۔ اتھارٹی دا مقصد ایس کم وچ ربط پیدا کر کے مقامی تے قومانتری کوششاں نوں اک جگھا کٹھا کرنا اے۔ اتھارٹی فرقا وارانا تقسیم نوں ختم کرن وچ وی معاون ثابت ہووے۔ وزیراعظم عمران خان نے کہیا اے کہ ملک دی بقاء اخلاقی اقدار نوں مضبوط کرن وچ اے۔ اخلاقی اقدار دی بہتری لئی نبی کریم ؐ دی سیرت طیبہ راہنمائی دا ذریعا اے۔ رحمت اللعالمین اتھارٹی اخلاقیات دی قومی سطح اُتے بہتری لئی کلیدی اہمیت دی حامل اے۔