بادشاہت وچ نہیں آں ،ساسارے مذاکرات آئین تے قانون دے تحت ہورہے نیں: فواد چودھری……٭رویل خبر٭

اسلام آباد (نیوز ڈیسک) وفاقی وزیر اطلاعات و نشریات فواد چودھری نے کالعدم تنظیم تحریک لبیک پاکستان (ٹی ایل پی) نُوں مخاطب کردیاں ہویاں کہیا اے کہ تسیں طاقت نال ریاست توں گلاں نہیں منوا سکدے جد کہ مذاکرات آئین تے قانون دے تحت ہون گے‘ ریاست نُوں کمزور نہ سمجھو‘ اسیں وڈے وڈے دہشتگرد گرُپاں نُوں شکست دِتی اے۔ جمعے نُوں اسلام آباد وچ قومی سلامتی دے اجلاس د ے بعد پریس کانفرنس وچ وفاقی وزیر نے کہیا کہ ریاست ایہ برداشت نہیں کرے گی کہ تُسیں اِک حد توں اگے ودھو‘ اسیں بلکل نہیں چاہندے کہ سڑکاں اُتے خون رُڑھے‘ اسیں کیوں چاہواں گے کہ ملک وچ امن تے امان خراب ہووے۔ اوہناں نے کہیا کہ مذاکرات دا سلسلا جاری اے ایس لئی تُسیں لوک واپس اپنے گھراں نُوں جاؤ‘ اِنج نہیں ہو سکدا کہ تُسیں ڈنڈے دے زور نال ریاست توں اپنیاں گلاں منوا لوو گے۔ ریاست نُوں کمزور نہ سمجھو۔ حکومت بُہتی دیر مذاق برداشت نہیں کر سکدی‘ مظاہرین نُوں اِک حد توں اگے جان دی اجازت نہیں دتی جا سکدی‘ احتجاج دے کارن صورتحال ایہو جہی ہو گئی اے کہ کلمہ پڑھن والے نُوں اپنی گواہی دینی پے رہی اے۔ فواد چودھری نے وفاقی وزیر داخلا شیخ رشید دا حوالا دیندیاں ہویاں کہیا کہ مذاکرات تے ہو رہے نیں تے مذاکرات تے تحریک لبیک پاکستان (ٹی ایل پی) نال وی ہون گے‘ اسیں بادشاہت وچ نہیں آں ایس لئی سارے مذاکرات آئین تے قانون دے تحت ہورہے نیں۔ وفاقی وزیر نے کہیا کہ اِنج نہیں ہوندا کہ تُسیں کہوو کہ جو ساڈا اے اوہ ساڈا اے تے جو تہاڈا اے اوہ وی ساڈا اے‘ اِنج نہیں ہوندا‘ جھیڑے راہیں کجھ نہیں ملے گا۔ اوہناں نے ایس گل اُتے زور دِتا کہ علماء کرام حق دی گل کرن لئی اگے ودھ کے کردار ادا کرن۔ فواد چودھری نے ٹی ایل پی ریلی تے احتجاجی رلتیاں نُوں مخاطب کر کے کہیا کہ اوہ واپس اپنے گھراں نُوں روانا ہو جان‘ حکومت ایہ مذاق بُہتی دیر برداشت نہیں کرے گی۔ اوہناں نے کہیا کہ قومی سلامتی دے سارے اراکین اِک پیج اُتے نیں‘ ایس معاملے دا انتہائی سنجیدگی تے غور نال جایزا لے رہے آں‘ اسیں جھیڑے نہیں امن راہیں معاملات نُوں حل کرنا چاہندے آں‘ جہنوں ریاست دی کمزوری نہ سمجھیا جاوے۔ فواد چودھری نے کہیا کہ قومی سلامتی دے اجلاس دا اعلامیا جاری کر دِتا گیا اے‘ ٹی ایل پی دے احتجاج وچ 5 پولیس اہلکار شہید تے درجناں زخمی ہوئے نیں۔ اوہناں نے کہیا کہ رحمتہ للعالمین ؐ بارے پوری مسلم امت اِک مُٹھ اے‘ پر تحریک لبیک والے اِک جتھا لے کے آ گئے تے حکومت دا مذاق اُڈایا جا رہیا اے۔ اوہناں نے کہیا کہ 5`6 دن توں جی ٹی روڈ بلاک اے‘ تے تاجر ریاست ول ویکھ رہے نیں‘ حکومت نے بہت صبر دا مظاہرا کیتا اے‘ ایہ جان لوو کہ اسیں وڈے وڈے دہشتگرد گرُپاں نُوں ہرایا اے۔