حکمران اپنی انا ختم کر کے مذاکرات راہیں مسئلا حل کرن:سپیکر پنجاب اسمبلی چودھری پرویز الٰہی……٭رویل خبر٭

لاہور (نیوز ڈیسک) سپیکر پنجاب اسمبلی چودھری پرویز الٰہی نے کہیا اے کہ حکمران اپنی انا ختم کر کے مذاکرات راہیں مسئلا حل کرن تے خون خرابے دے ذمے دار نہ بنن‘ حکمراناں دے کول ایہدے علاوا ہور کوئی چارا نہیں کہ امن بحال ہووے کیوں جے سارا مسئلا ایہناں دے ذمے لگ رہیا اے۔ اوہناں نے کہیا کہ پولیس دے جوان شہید ہو رہے نیں‘ راہواں دی بندش نال لوک ایمبولینساں وچ مر رہے نیں اوہ کیہ کسے توں گھٹ مسلمان نیں‘ شہیداں دیاں بیواواں تے بالاں توں کوئی جا کے پُچھے کہ اوہ کہڑے حال وچ نیں۔ چودھری پرویز الٰہی نے کہیا کہ جدوں دوہاں پاسیوں اپنے ای مسلمان مر رہے ہون تے نقصان کہدا ہو رہیا اے؟‘ حکمران ایس گل نُوں سجھن کہ حکومتاں دی کوئی انا نہیں ہوندی تے امن دے سوا کوئی چوائس نہیں‘ ایس ساری صورتحال وچ نقصان صرف اپنے ملک دا ہور ہیا اے‘ گلبات دے بوہے بند نہیں ہونے چاہیدے نیں‘ مسئلے دا حل مذاکرات نال ای نکلے گا‘ دشمن نال مذاکرات ہو سکدے نیں تے اپنے ملک دی لوکائی نال کیوں نہیں؟۔