افغان جنگ نال پاکستان براہ راست متاثر ہو رہیا اے:مشیر قومی سلامتی امور ڈاکٹر معید یوسف……٭رویل خبر٭

اسلام آباد (نیوز ڈیسک) مشیر قومی سلامتی امور ڈاکٹر معید یوسف نے کہیا اے کہ پاکستان وچ ہون والی دہشتگردی دے تانے بانے افغانستان نال ملدے رہے۔ افغانستان 4 دہاکیاں توں جنگ دی صورت حال وچ اے‘ افغان جنگ نال پاکستان براہ راست متاثر ہو رہیا اے۔ بھارت وچ مشیر قومی سلامتی دی کانفرنس وچ نہیں جاواں گا‘ اک سپایلر پیس میکر دا کم نہیں کر سکدا۔ دُنیا افغان حکومت نال تعاون کرے افغانستان توں متعلق معاملا سیاسی نہیں سگوں انسانیت دا اے۔ افغانستان اُتے پاکستان تے ازبکستان د اموقف اک اے۔ ایہناں خیالات دا اظہار اوہناں نے منگل نوں اک تقریب نال خطاب کردیاں ہویاں کیتا۔ مشیر قومی سلامتی امور ا کہنا سی کہ پاکستان دا جغرافیا انتہائی اہم اے‘ ماضی وچ اسیں ایس جغرافیے توں جہڑا فایدا چکنا سی اوہ بدقسمتی نال نہیں چُک سکے۔ سنٹرل ایشیا دے مُلکاں وچ ازبکستان اہم کردار ادا کردا اے۔ 4 دہاکیاں توں افغانستان جنگ دی صورت حال وچ اے تے افغان جنگ نال پاکستان براہ راست متاثر ہو رہیا اے۔ افغانستان وچ لوکاں کول اپنیاں ضرورتاں پوریاں کرن لئی اخراجات نہیں نیں۔ پاکستان وچ ہون والی دہشتگردی دے تانے بانے افغانستان نال ملدے رہے۔ ناین الیون دے بعد اسیں دہشتگردی خلاف جنگ وچ بے بہا قربانیاں دِتیاں۔ اسیں افغانستان وچ امن تے استحکام دی گل کردے آں تے ساڈی ضرورت اے کہ افغانستان وچ امن تے استحکام ہووے‘ افغانستان وچ قیام امن لئی پاکستان تے ازبکستان رل کے کم کرن گے۔ اوہناں نے کہیا کہ پاکستان دی معیشت نوں 150 ارب ڈالر دا نقصان ہویا۔ چین نال سی پیک منصوبے اُتے کم جاری اے۔ وسطی ایشیا نال ساڈی ایس طرحاں انگیجمنٹ نہیں رہی جس طرحاں ہونی چاہیدی سی۔ ایس حوالے نال وزیراعظم تے ازبک صدر نے بیتے ہفتے فون اُتے گل وی کیتی سی۔ وزیراعظم وار وار ایہ گل کردے نیں کہ پاکستان جیو اکنامک پیراڈایم وچ اپنے آپ نوں ٹرانسفارم کر رہیا اے۔ افغانستان اُتے پاکستان تے ازبکستان دا موقف اک اے۔ دوہاں مُلکاں دا موقف اے کہ ایس ویلے افغانستان اُتے ایس طرحاں تعمیری گل بات کیتی جاوے کہ افغانستان اُتے کوئی انسانی المیا جنم نہ لوے‘ اسیں دہشتگردی دے سبھ توں وڈے وکٹم آں۔ ساڈی سلامتی لئی ضروری اے کہ افغانستان وچ امن ہووے۔ ساڈے کول افغانستان نال ڈس انگیج کرن دا کوئی آپشن نہیں اے‘ ازبکستان تے پاکستان ایس سی او دے فورم اُتے وی کٹھے کم کر رہے نیں۔ ایس پروٹوکول وچ منشیات تے دہشتگردی دے انسداد‘ انسداد منشیات فورس تے ہور معاملات اُتے گل بات ہووے گی۔ ازبکستان نال پہلے ای چنگے دفاعی تعلقات موجود نیں‘ نیشنل سیکیورٹی ڈویژن ایس پروٹوکول دی مرکزی اساس ہووے گی۔ اتفاق ہویا کہ سیکیورٹی دے حوالے نال پچھلے معاہدیاں نوں اگے لے کے چلاں گے۔ ازبکستان دے مشیر پاکستان دے 3 دِنا دورے اُتے پاکستان وچ نیں تے ایہ اوہناں دا دورا تواریخی اے۔ ازبک مشیر قومی سلامتی وزیراعظم‘ وزیر خارجا نال ملاقاتاں کرن گے۔ اوہ جی ایچ کیو دا دورا کرن دے نال نال اج (بدھ نوں) طور خم سرحد دا دورا وی کرن گے۔ اوہناں نال رزاق داؤد وی ہون گے‘ اوہ پی ایم اے دا دورا وی کرن گے۔ مشیر قومی سلامتی امور دا کہنا سی کہ میں بھارت وچ مشیر قومی سلامتی دی کانفرنس وچ نہیں جاواں گا کیوں جے اک سپایلر پیس میکر دا کم نہیں کر سکدا۔ دُنیا افغان حکومت نال تعاون کرے‘ افغانستان توں متعلق معاملا سیاسی نہیں سگوں انسانیت دا اے۔ پاکستان تے ازبکستان دا موقف ساریاں ساہمنے اے۔