لوکائی نوں وکھاؤ (ن) لیگ نے کیہ کرپشن کیتی‘ موجودا حکومت دی کرپشن لوکائی دے گھر تک جا  اپڑی:شاہد خاقان عباسی……٭رویل خبر٭

اسلام آباد (نیوز ڈیسک) پچھلے وزیراعظم تے مسلم لیگ (ن) دے آگو شاہد خاقان عباسی نے تیجے نیب ترمیمی آرڈیننس اُتے شدید تنقید کردیاں ہویاں کہیااے کہ نواں نیب ترمیمی آرڈیننس بدنیتی اُتے مبنی اے۔ نویں نیب آرڈیننس دا اطلاق حکومت دی چوری اُتے نہیں ہوندا‘ کہ دیو آرڈیننس دا اطلاق صرف (ن) لیگ اُتے ہووے گا‘ چیئرمین نیب تاحیات ہون گے‘ ہٹان دا اختیار صدر نوں مل گیا۔ اسلام آباد وچ میڈیا نال گل بات کردیاں ہویاں شاہد خاقان عباسی نے کہیا کہ نویں آرڈیننس دے تحت صدر مملکت کسے وی ویلے چیئرمین نیب نوں کڈھ سکدے نیں‘ ایہ صرف اک آرڈیننس دی مار نیں۔ پہلے دن توں کہیا اے کہ نیب آرڈیننس بدنیتی اُتے مبنی اے۔ ایہ آرڈیننس 10 منٹ وچ بنا کے ساہمنے لے آندے نیں‘ قانون نال نہ کھیڈیا جاوے‘ حکومت لئی مشکل پیدا ہو جاوے گی۔ کہ دیو نیب آرڈیننس صرف مسلم لیگ (ن) لئی اے۔ اوہناں نے کہیا کہ حکومت جِنی وی چوری کر لوے اوہ معاف اے‘ لوکائی نوں وکھاؤ (ن) لیگ نے کیہ کرپشن کیتی‘ موجودا حکومت دی کرپشن لوکائی دے گھر تک جا پہنچی۔ 120 رُپئے فی کلو چینی وچوں 70 رُپئے عمران خان تے اوہناں دے وزیراں دی جیب وچ جا رہے نیں۔ براڈ شیٹ وچ کہنے کہنوں پیسے دِتے کوئی نہیں جاندا۔ شاہد خاقان عباسی دا کہنا سی کہ نیب دے پراسیکیوٹر تے ملازم کٹہرے وچ کھڑے ہون گے۔ اوہناں نے ٹی ایل پی نال کیتے گئے معاہدے نوں لوکائی دے ساہمنے لیان دا مطالبا کردیاں ہویاں کہیا اے کہ پہلے اک جماعت نوں کالعدم قرار دِتا فیر پیر پھڑ کے معافیاں منگیاں گئیاں‘ کالعدم جماعت نال کیتا گیا معاہدا کویں ہویا لوکائی دے ساہمنے کیوں نہیں آیا؟