بھارت وچ صرف مسلمان ای نہیں ہور اقلیتاں وی ہندو انتہا پسنداں دے نشانے اُتے نیں:گونر پنجاب……٭رویل خبر٭

لاہور (نمایندا رویل) گونر پنجاب چودھری محمد سرور نے بھارتی ریاست تری پورا وچ 10 دناں وچ مسجداں اُتے حملاں دے 17 واقعات نوں مذہبی ازادی دا قتل عام قرار دیندیاں ہویاں کہیا کہ بھارت اقلیتاں لئی دُنیا دا خطرناک ملک بن چکیا اے۔ اقوام متحدا تے انسانی حقاں دے ہور عالمی اداریاں دی شرمناک خموشی وی بدترین ناانصافی اے۔ پاکستان بھارت وچ وسن والے مسلمان بھین بھراواں نال اے‘ اوہناں دے تحفظ تے حقاں لئی اواز چکدے رہواں گے۔ تفصیلات مطابق منگل دے دیہاڑے گورنر پنجاب چودھری محمد سرور نے اپنے اک ٹویٹ دوران مسجداں اُتے حملیاں دی ویڈیو شیئر کردیاں ہویاں کہیا کہ بھارت وچ مسجداں تے مسلماناں نوں دہشتگرد تنظیم آر ایس ایس دے غنڈیاں سنے ہور انتہا پسند تنظیماں ولوں نشانا بنان دے واقعات وچ خطرناک حد تک وادھا ہو رہیا اے پر بدقسمتی نال نریندر مودی دی حکومت تے بھارتی پولیس سنے اوہناں دے ادارے وی آر ایس ایس دے دہشتگرداں نوں سپورٹ کر رہے نیں تے مسلماناں لئی بھارت وچ رہنا اوکھا کیتا جا رہیا اے جہدی جِنی مذمت کیتی جاوے اوہ گھٹ اے۔ اوہناں نے کہیا کہ بھارت وچ صرف مسلمان ای نہیں ہور اقلیتاں وی ہندو انتہا پسنداں دے نشانے اُتے نیں۔ اوہناں نے کہیا کہ وقت آ چکیا ے کہ اقوام متحدا سنے ہور عالمی ادارے بھارت وچ مسلماناں تے ہور اقلیتاں اُتے ہون والے ظلماں اُتے خموشی اختیار کرن دی بجائے اوہناں دا نوٹس لین تے سفارتی سنے ہور وسیلیاں دا استعمال کر کے بھارتی حکومت نوں اقلیتاں دے جان تے مال دے تحفظ تے اوہناں ددی مذہبی ازادی دے تحفظ نوں یقینی بنان اُتے مجبور کیتا جاوے۔ گورنر پنجاب نے کہیا کہ الحمد للہ پاکستان وچ ہندو تے مسیحیاں سنے ہور اقلیتاں نوں جِنی مذہبی ازادی تے تحفظ حاصل اے دُنیا وچ اوہدی کوئی ہور مثال نہیں ملدی تے پاکستان ہر لحاظ نال اقلیتاں لئی دُنیا دا محفوظ ترین ملک اے‘ اسیں بھارت وچ وسن والے مسلمان بھین بھراواں نوں وی یقین دواندے آں کہ پاکستان اوہناں دے حقاں دے تحفظ لئی اقوام متحدا سنے ہور عالمی فورمز اُتے بھرپور اواز چکے گا تے اوہناں نوں کسے صورت کلیاں نہیں چھڈیا جاوے گا۔ اوہناں نے بلوچستان وچ ہون والی دہشتگردی دے واقعے دی شدید مذمت کردیاں ہویاں کہیا کہ دہشتگردی خلاف جنگ وچ پوری قوم پاکستان دِیاں فوجاں تے ہور سیکیورٹی فورسز نال اے۔ اوہناں نے کہیا کہ ان شاء اللہ پاکستان چوں دہشتگرداں تے اوہناں دے سہولت کاراں دا مکمل صفایا کیتا جاوے گا۔