کھل لُہائی دا ریلیف پیکج۔۔۔۔۔٭رویل کالم٭

کھل لُہائی دا ریلیف پیکیج۔۔۔۔۔٭رویل کالم٭

دنیا دی تواریخ وچ انوکھا ریلیف پیکیج جو بیتے دن پیش کیتا گیا‘ اوہدے وچ لوکائی نوں ریلیف دین نالوں ودھ کے لوکائی دی کھل کھچائی تے کھل لُہائی دا بھرواں بندوبست کیتا گیا اے۔ وزیر اعظم دی تقریر وچ لوکاں نوں ریلیف نالوں ودھ کے ڈرا دین والیاں گلاں سن۔ اوہناں نے فرمایا کہ دنیا وچ مہنگائی 50 فیصد اے جد کہ ایہدے مقابلے پاکستان وچ صرف 9فیصد اے۔ اوہناں نے پٹرول دا مل ودھان دا ڈراوا وی دتا جد کہ دسیا کہ سردیاں وچ گیس دا مسئلا وی جنم لین والا اے۔ اوہناں نے منافع کمان والے کھیتراں دے سیٹھاں نوں ہدایت کیتی کہ اپنے ملازماں دِیاں تنخاہواں وچ وادھا کرن۔آٹے بارے اوہناں نے دسیا کہ اوہ بھارت وچ 83رپئے کلو‘ بنگلا دیش وچ وی اینے ای مل جد کہ پاکستان وچ 60رپئے کلو اے۔

ساڈے خاباں دی دنیا وچ رہن والے تے جھوٹھو جھوٹھ چتالی ثابت کرن والے مشیراں دی سیانپ کولوں فایدا چک کے گلاں کرن والے حکمران نرا دنیا دے مختلف دیساں نال تقابل کر کے پاکستان وچ بہتر حالات دی دس ای پاندے نیں‘ ایہ نہیں دسدے کہ دنیا دے اصل حالات کیہ نیں۔ نرا آٹے دی ای گل کریے تاں بھارت تے بنگلا دیش وچ پاکستان نالوں مزدوری دُگنی اے۔ یعنی پاکستان وچ جے کوئی مزدور پنج سو رپئے دیہاڑی لیندا اے تاں بھارت تے بنگلا دیش وچ اوہ اوسے کم دے اک ہزار رُپئے لیندا اے۔ یعنی اوہدی قوت ء خرید پاکستان نالوں دُگنی اے۔ پاکستان وچ جے آٹا 60 رُپئے کلو اے تاں بھارت تے بنگلا دیش وچ ایہ 120رپئے کلو ہووے‘ فیر حساب برابر ہوندا اے جد کہ اوہناں دوہاں دیساں وچ ایہ نرا 83 رپئے کلو‘ یعنی پاکستان نالوں لگ بھگ اک تہائی ودھ مہنگا وِک رہیا اے یعنی اوہناں دوہاں دیساں وچ پاکستان نالوں 60 فیصد توں وی ودھ سستائی اے۔

جہڑی سبسڈی دا اعلان کیتا گیا اے‘ اوہ آوندے 6 مہینے تک لئی اے‘ بعدوں کیہ ہووے گا‘ ایہدے بارے کجھ نہیں آکھیا جا سکدا۔ ایس ریلیف پیکیج دے نال ای روز ورتوں دیاں وستاں وچ انھے واہ وادھا کر دتا گیا اے۔ نرا گھیو ای گل کیتی جاوے تاں یوٹیلیٹی سٹورز اُتے اوہدے مل وچ 65 رپئے فی کلو تیکر دا وادھا کر دتا گیا اے۔ برانڈ گھیو جو پہلاں 354 رُپئے فی کلو سی‘ ہُن 392 رپئے کلو ویچیا جاوے گا۔ کوکنگ آیل وی 355توں ودھا کے 388رپئے کلو تک کر دتا گیا اے۔ ہول سیل مارکیٹ وچ چینی دی فی کلو قیمت 130 رُپئے کلو ہو گئی اے۔ ایس طرحاں لوکاں دی کنڈ اتے اوہ آخری تِیلھا وی رکھ دتا گیا اے جہدے بعد لک ٹٹ جاندا ہوندا اے۔

حکمراناں نوں بھارت یاں بنگلا دیش نال ملک دا موازنا کرن دی بجائے ایہ ویکھنا چاہیدا اے کہ لوکائی کہڑے حال اے تے اوہناں دے ساہ کویں سوکھے کیتے جا سکدے نیں۔ نہ کہ گوانڈھی دیساں نال تُلنا کر کے لوکاں دی کھل لاہن دا عمل جاری رکھنا چاہیدا اے۔

(شکریے نال روزوار "لوکائی" توں)