دُکھاں دی ہانن ۔۔۔۔۔ رفعت وحید ۔۔۔۔۔٭رویل کالم٭

دُکھاں دی ہانن ۔۔۔۔۔ رفعت وحید ۔۔۔۔۔٭رویل کالم٭

پنجابی شاعری وچ مرداں دے نال نال سوانْیاں دا کم وی تعریف توں گھٹ نہیں اے جتھے پنجابی شاعراں نیں پنجابی شاعری نوں وکھریاں وکھریاں صنفاں راہیں سوہنْیاں سوچاں نال سوہْنا بنْایا اے اوتھے ای سوانْیاں (شاعرات) نیں وی ایس زمین نوں اپنے حصے دا پانْی لایااے بہوں ساریاں شاعرات چوں اک ناں منفرد مقام دا دا حامل اے ایس ناں نے گھٹ سمے وچ ماں بولی دی اپنے شعری پراگے (اکھراں پیڑاں بوئیاں) راہیں خدمت کیتی اے

رفعت وحید اردو ادب وچ مشہور معروف ناں اے رفعت دی حیاتی بارے تھوڑی جنی جھات پاواں گا ۔

4 اپریل 1982 نوں بٹ خاندان وچ اکھ کھولی ایم اے تک تعلیم حاصل کیتی اردو شعر کہن دا شوق ستویں جماعت توں ای لگ گیا سی سکول،کالج دے مختلف پروگراماں وچ حصا لیندی رہی بیت بازی دے کئی مقابلے وچ نمایاں پوزیشناں وی حاصل کیتیاں

اسے شوق دے کارن اردو ادب نوں اک کتاب (سمندر استعارہ ہے)وی دان کیتی جہنوں ملک بھر دیاں اردو تنظیماں نیں کافی ایوارڈز دتے

پنجابی شعرکہن دا شوق وی زمانا طالب علمی توں سی تے ماں بولی لئی محبت دن رات اندر مچلدی رہندی سی حال ای وچ پنجابی ادب نوں اپنا لہو(اکھراں پیڑاں بوئیاں)وی دتا جیس نوں بہوں ساریاں پنجابی ادبی تنظیماں نیں ایوارڈ دتے جہناں تنظیماں نیں ایوارڈ دتے نیں اوہناں دے ناں کجھ ایس طرحاں نیں ۔

مہکاں ادبی ایوارڈ 2021

دل دریا پاکستان ادبی ایوارڈ 2021

جگت پنجابی سبھا ایوارڈ 2021

ہور وی کافی تنظیماں نیں جہناں دے ناں لکھنا چاہندا ساں پر ویلے دی اجازت نہیں مل رہی

رفعت وحید دی کتاب (اکھراں پیڑاں بوئیاں) کل 143 صفحیاں تے اے ایس نوں فرہاد پبلیکیشن راولپنڈی والیاں نے شایع کیتا اے ایس کتاب دا تبصرا ڈاکٹر ریاض مجید ہوراں نے لکھیا اے ڈاکٹر احسان اکبر،ڈاجٹر فرحت عباس ہوراں نیں وی رفعت دی شاعری تے جھات پائی اے

کتاب دا فلیپس جمیل یوسف،تابش کمال،نثار ترابی،فرحت عباس شاہ ہوراں تحریر کیتے نیں

جمیل یوسف صاحب ہوراں دے بقول

"رفعت وحید دی شاعری دی اوہی مٹھاس اے جہڑی شاعری دا شوق رکھن والیاں نوں پنجابی دے عظیم شاعر میاں محمد بخش دی سیف الملوک وچ محسوس ہوندی اے"

جمیل صاحب دی گل بلکل درست اے رفعت وحید نے پنجابی شاعری نوں بڑے کوملتا،رس بھرے شعر دتے نیں جہڑے صدیاں تیکر زندہ رہن گے تے رفعت وحید نوں امر کر دین گے

رفعت وحید نے مختلف اوزاناں،بحراں ،تشبیہاں،علامتاں،استعاریاں ،ردیفاں دا ورتارا کر کے دس پائی اے پئی اوہ پنجابی شاعری دی بہوں پرانی جانو اے تے پنجابی شاعری دی پڑھاک ،سنواک تے جانی جان اے

رفعت وحید رب دیاں حمد کردی اے تے کہندی اے۔

تری ای میں وحدت دا پرچار کردی

ترے نال مولا بڑا پیار کردی

حمد توں حضور اکرم صلی اللہ علیہ وآلہ وسلم دی شان وچ انج اکھراں دے پھل نچھاور کردی اے

منظر اکھ توں جان نہ دیواں

ہووے جے دیدار نبی دا

رفعت وحید دی غزلاں دے کجھ شعر تہاڈیاں بصارتاں دی نذر کراں گا تسیں آپے فیصلا کرنا پئی رفعت وحید غزل دی زمین تے کنے کوں سوہنے بیہیاں دا کھلارا پایا اے

انھا راجا حاکم اے

ربا دنیا کانی دا

نیلے رنگ دے بدلاں نیں

رتا سورج چایا اے

میں تے پیڑ ردیفاں وچوں کڈھنی اے

انج دا اکھراں اندر درد لکونا اے

اج کل جتھے تینوں گھر پئے دِسدے نیں

اوتھے کل دیوار اساری جاوے گی

اگ،ہوا تے پانی والے

جسے اتے کھل نہیں ہوندی

اپنی بھکھ نوں مارن دے لئی

بندا بھکھ نوں کھا جاندااے

سفنا تیرا برفاں ورگا

اکھاں اندر کُھر جاندااے

چٹے رنگ دے یار غبارے دے اندر

میں تے ٹھڈا ہوکا بھر کے چھڈیا اے

اج کل کٹھے بہندے آں

یاد پرانی،میں تے دکھ

ساڈا اکو جنم دیہاڑ اے صدیاں توں

میں عشقے نوں سر تے چا کے آئی آں

میں دکھڑے دی ہانن آں

دکھڑا میرا ہانی اے

بھاویں لکھاں چیکاں مار

ہجرا ایہ اڈیکاں مار

تگڑے اپنی چیچی وچ

ہیرا سمجھ کے جَڑیا سپ

رفعت وحید دا مڈھلا شعری پراگا (اکھراں پیڑاں بوئیاں) پنجابی ادب وچ بہوں وڈا ودھا اے

میں امید کرداں آں پئی اگے وی رفعت وحید پنجابی ادب دی خدمت اپنے اکھراں نال کردی رہوے گی

ماں بولی نوں بہوں اگے تیکر لے جاوے گی

رب اکبر رفعت وحید دیاں سوچاں نوں سلامت رکھے آمین۔