سردیاں وچ اِک دن وچ 3 وار گیس ملے گی: وفاقی وزیر توانائی، گیس بحران دا کلّا حل ایران پاکستان گیس پائپ لائن اے:سلیم مانڈوی والا ……٭رویل خبر٭

اسلام آباد (نمایندا رویل) وفاقی وزیر توانائی حماد اظہر نے کہیا اے کہ سردیاں وچ اِک دن وچ 3 وار گیس ملے گی‘ ہفتے وچ 3 دن گیس ملن دی جے خبر اے تے درست نہیں‘ مذاکرات دے نویں دور لئی دور توں 3 دن وچ روس دا وفد دُبارا آئے گا۔ سینیٹ وچ سوالاں دے وقفے دوران وفاقی وزیر حماد اظہر نے دَسیا کہ سردیاں وچ 1 دن وچ 3 وا ر گیس ملے گی‘ ناشتا‘ دُپہر دے کھانے تے رات دے کھانے ویلے گیس ملے گی۔ حماد اظہر نے کہیا کہ ہفتے وچ 3 دن گیس فراہمی دی جے خبر ہے تے درست نہیں‘ وس دے نال گیس پائپ لائن دے حوالے توں معاملات تیزی نال اگے ودھ رہے نیں۔ اوہناں نے کہیا کہ روس دا اِک وفد کجھ دن پہلاں پاکستان توں واپس گیا اے‘ مذاکرات دے نویں دور لئی 2 توں 3 دن وچ روس دا وفد دُبارا آئے گا۔ وفاقی وزیر نے کہیا کہ ایل این جی پی ایل ایل بورڈ راہیں خریدیا جاندا اے‘ اِکیاں دو کارگوز دی خریداری پی ایس او بورڈ راہیں ہوندی اے۔ وزیر توانائی نے کہیا کہ بورڈ دی منظوری دے بغیر کوئی خریداری نہیں ہوندی‘ پورے دا پورا پروسس شفاف انداز وچ اِک بورڈ راہیں طے پاندا اے۔ وفاقی وزیر نے کہیا کہ نومبر توں دسمبر لئی 11 ہو ر کارگوز لئے نیں۔ گیس بحران بارے سینیٹر شیری رحمان نے توجا دلاؤ نوٹس اُتے کہیا کہ ملک وچ گیس دیاں قیمتاں دا بحران اے۔ اوہناں نے کہیا کہ گیس دی قیمت وچ خوفناک 300 فیصد تک وادھا ہو چُکیا اے‘ ایس ویلے ملک وچ گیس دی کمی اے‘ ایل این جی کارگو دے حوالے توں اینا وڈا سکینڈل آیا اے۔ اہوناں نے کہیا کہ ایل این جی دی گرمی وچ 13 ڈالرز قیمت سی‘ اوہناں نے نہیں خریدی‘ ہُن ایہناں نے 30 ڈالرز وچ ایل این جی خریدی اے‘ ایہدے اُتے تہاڈا نقصان 10کھرب رُپئے اے۔ اوہناں نے کہیا کہ ایل این جی دے معاملے دی تحقیقات کیوں نہیں ہوئی‘ نیب تے اوگرا کیوں چُپ نیں‘ ایہناں دی حکومت جاندیاں ای ایہ انکوائری کھلے گی۔ اوہناں نے کہیا کہ گیس دی لوڈشیڈنگ اینی ہو گئی کہ گھریلو صارفین نُوں صرف 3 دن گیس ملے گی۔ اوہناں نے کہیا کہ نویں پاکستان وچ تُسیں کھانا نہیں بنا سکو گے۔ اوہناں ن کہیا کہ اسد عمر کہندے نیں گیس دا بحران سندھ حکومت دا پیدا کیتا گیا اے‘ سندھ 70 فیصد گیس دیندا اے پر سندھ نُوں مِل کیہ رہیا اے‘ پورا ملک کھا گیا بلوچستان دی گیس تے اوہناں نُوں کجھ نہیں مِلیا‘ ہُن پورا ملک سندھ دی گیس کھا رہیا اے‘ سندھ دیاں 52 فیصد مِلاں دے چُلھے ٹھنڈے ہو رہے نیں‘ سندھ نُوں معاشی پہیا چلان تے گھریلو صارفین لئی گیس دا آئینی حق ملنا چاہیدا اے۔ سلیم مانڈوی والا نے کہیا کہ گیس بحران دا کلّا حل ایران پاکستان گیس پائپ لائن اے‘ جدوں تک ایران گیس پائپ لائن نہیں آئے گی پاکستان بحران وچ رہو یگا۔ اوہناں نے کہیا کہ ایران پاکستان پائپ لائن دے حوالے توں سوچو‘ بھارت‘ ایران توں دھڑا دھڑ گیس لے رہیا اے‘ تُسیں ایل این جی اُتے شاہد خاقان تے مفتاح نُوں جیل وچ سُٹیا تے ہُن اوس توں مہنگی گیس خرید رہے او‘ ایہناں دے خلاف نیب و چ کہڑا جاوے گا۔