مولانا فضل الرحمان تے بلاول بھٹو دی ملاقات،ملکی سیاسی صورتحال اُتے وچار وٹاندرا   ……٭رویل خبر٭

اسلام آباد (نمایندا رویل) پاکستان پیپلز پارٹی تے پی ڈی ایم دے وچکار فاصلے گھٹ ہون لگے‘ پاکستان پیپلز پارٹی دے چیئرمین بلاول بھٹو زرداری نے جمعیت علمائے اسلام دے آگو مولانا فضل الرحمان دی رہایش گاہ اُتے اوہناں نال ملاقات کیتی جہدے وچ ملکی سیاسی صورتحال اُتے وچار وٹاندرا کیتا گیا۔ جمعے نُوں چیئرمین بلاول بھٹو زرداری نے مولانا فضل الرحمان توں اوہناں دی صحت بارے خیریت دا پُچھیا تے ملکی سیاسی صورتحال اُتے وچار وٹاندرا کیتا گیا۔ چیئرمین بلاول تے مولانا فضل الرحمان نے ملک وچ ودھدی مہنگائی اُتے ہرکھ دا وکھالا کیتا۔ بلاول نے کہیا کہ تُسیں بزرگ سیاستدان او‘ 3نسلاں توں ساڈا رشتا اے۔ اہوناں نے کہیا کہ الیکٹرانک ووٹنگ مشین تے احتساب دے حوالے توں قوانین اُتے پارلیمان وچ سانجھا لائحے عمل ہور کامیابیاں دا کارن بن سکدا اے۔ اوہناں نے کہیا کہ پارلیمان راہیں ای حکومت دیاں پالیسیاں نُوں ناکام بنایا جا سکدا اے‘ حکومت دیاں پارلیمان وچ حالیا شکستاں اپوزیشن دیاں وڈیاں کامیابیاں نیں۔ چیئرمین بلاول بھٹو دے نال یوسف رضا گیلانی تے قمر زمان کائرا وی مولانا فضل الرحمان نال ملاقات دے موقع اُتے موجود سن جد کہ مولانا فضل الرحمان دے نال مولانا اسعد محمود تے مولانا صلاح الدین ایوبی ملاقات دے موقع اُتے موجود سن۔ ملاقات دے بعد میڈیا نال گلبات کردیاں ہویاں بلاول بھٹو زرداری نے کہیا کہ الیکٹرانک ووٹنگ مشین (ای وی ایم)‘ نیب(ترمیمی) آرڈیننس سنے ہور متنازع بلز نُوں متحدا اپوزیشن دی صورت وچ ناکام بنا دِتا گیا‘ امید اے حکومت دی ہر سازش نُوں اِک مُٹھ ہو کے ناکام بناواں گے۔ اوہناں نے کہیا کہ سدیا گیا پارلیمنٹ دا سانجھا اجلاس رات دے انھیریاں وچ مؤخر کر کے وزیراعظم نَسن اُتے مجبور ہویا۔ بلاول بھٹو زرداری نے کہیا کہ پارلیمنٹ وچ سیاسی جماعتاں متحد نیں مضبوط نیں۔ بلاول نے کہیا کہ مولانا فضل الرحمان نال پیپلز پارٹی دا تعلق صرف کجھ دن اُتے مشتمل نہیں سگوں ایہدی لمی تواریخ اے‘ وڈیاں دا تعلق اے ہُن میں تے مولانا اسعد پارلیمنٹ وچ رَل کے کم کردے آں۔ اوہناں نے خُشی دا اظہار کیتا کہ جے یو آئی (ف) د ے نال تعلقات قائم رہن گے تے مولانا فضل الرحمان اپوزیشن جماعتاں وچ ایکے نُوں یقینی بنان لئی کلیدی کردار ادا کیتا‘ حکومت دی ناکامی وی ایسے ایکے دی مرہون منت اے۔ اوہناں نے کہیا کہ ساڈی اپنی سیاست چلدی رہوے گی تے ساڈا تعلق وی ضرور رہوے گا تے مولانا فضل الرحمان دے شکر گزار آں جس طریقے نال اپوزیشن دے نال رَل کے کردار ادا کر رہے نیں۔ اوہناں نے کہیا کہ پاکستان دی لوکائی ساڈے توں امید رکھدی اے۔ ایس موقع اُتے مولانا فضل الرحمان نے کہیا کہ بلاول پہلے وی آندے رہے نیں‘ کئی نسلاں توں ساڈا تعلق اے‘ پارلیمنٹ وچ اپوزیشن متحدا کردار ادا کر رہی اے‘ ایہ ویلے دی ضرورت اے‘ ایہ لوکائی دے دلاں دی نمایندگی اے۔ مولانا فضلا لرحمان نے کہیا کہ دھاندلی نال آن والی حکومت نُوں انتخابی اصلاحات کرن دا کوئی حق نہیں‘ حکومت دیاں تجویزاں نُوں کسے قیمت اُتے تسلیم کرن لئی تیار نہیں آں۔ اوہناں نے کہیا کہ جے حکومت جعلی طریقے نال پارلیمنٹ وچ اکثریت حاصل کرے گی‘ ایہنوں آمرانا عمل تصور کرو جو پالیمنٹ دی روایت دے منافی ہووے گا۔ مولانا فضل الرحمان نے کہیا کہ حکومت اِک قانون سازی وچ شکست کھا چکی اے‘ جہدے بعد ایہناں نُوں پارلیمنٹ دا سانجھا اجلاس ملتوی کرنا پیا تے پتا نہیں ایس دوران اوہ کیہ گل کھوان گے‘ ایدھر اودھر مونہ مارن گے تے ویچ وٹک کرن گے۔ اوہناں نے کہیا کہ جے حکومت پارلیمنٹ دا سانجھا اجلاس دُبارا سدیا تے ایسے ایکے دے نال ایہدی نفی کیتی جاوے گی۔ اِک سوال دے جواب وچ اوہناں نے کہیا کہ جولائی 2018 وچ متفقا موقف اختیار کیتا سی کہ اسیں جعلی حکومت تسلیم نہیں کردے تے قوم نُوں ووٹ دا حق واپس ملنا چاہیدا اے‘ تے چوری شدا انتخاب اُتے قائم ہون والی حکومت قبولن جوگ نہیں اے۔ پیپلز پارٹی ولوں پی ڈی ایم توں وکھرا ہون تے ہُن دُبارا اپوزیشن دا حصا بنن دے سوال دے جواب وچ مولانا فضل الرحمان نے کہیا کہ بلاول بھٹو زرداری نال سارے امور اُتے گل نہیں ہوئی اے‘ اج دی ملاقات خیر سگالی دا مظاہر اے۔ اوہناں نے کہیا کہ بلاول ساڈے پروہنے نیں تے روایت دا تقاضا اے کہ کوئی ایہو جہی گل نہیں کیتی جاوے جہدے نال تکلیف پہنچے۔ مولانا فضل الرحمان نے کہیا کہ اسیں جعلی حکومت نُوں بڑی چھیتی گھر گھلاں گے۔ اِک سوال اُتے اوہناں نے کہیا کہ میں پی ڈی ایم دا آگو آں تے کلّا کجھ وی نہیں کردا۔ اوہناں نے کہیا کہ ساڈا شروع توں ای اِک مطالبا نویاں چوناں نیں۔ بلاول نے کہیا کہ پی ڈی ایم وچ پیپلز پارٹی دی واپسی اُتے کوئی گل نہیں ہوئی‘ اک مُٹھ ہو کے حکومت دی ہر سازش ناکام بناواں گے۔