سموگ انسانی صحت لئی نقصان دہ،مسئلے نوں حل کرن لئی اُچیچے پربندھ کرنے پینے نیں: سردار عثمان بزدار……٭رویل خبر٭

لاہور (نمایندا رویل) وزیر اعلا پنجاب سردار عثمان بزدار نے لاہور سنے ہور شہراں وچ سمو گ دے تدارک لئی ضروری اقدامات اُتے مؤثر عملدرآمد دا حکم دِتا اے۔ وزیر اعلا عثمان بزدار نے کہیا کہ سموگ انسانی صحت لئی مضر اے‘ مؤثر اقدامات یقینی بنائے جان تے سموگ دا کارن بنن والے عوامل اُتے قابو پان لئی کارروائی عمل وچ لیاندی جاوے۔ محکما تحفظ ماحول‘ ٹرانسپورٹ تے انتظامیا دے افسران فیلڈ وچ آپ جان۔ اوہناں نے کہیا کہ سموگ چ کمی لئی جاری ایس او پیز اُتے عملدرآمد وچ کوتاہی برداشت نہیں کیتی جاوے گی۔ پنجاب وچ انسانی زندگیاں دے تحفظ لئی سموگ نُوں آفت متھیا گیا اے تے فصلاں دیاں باقیات نُوں اگ لان اُتے پابندی لائی گئی اے۔ اوہناں نے کہیا کہ پابندی دے باوجود فصلاں دیاں باقیات نُوں اگ لان والے بندیاں دے خلاف بلا امتیاز کارروائی عمل وچ لیاندی جاوے۔ صنعتی یونٹاں نُوں امیشن (Emission) کنٹرولی سسٹم لان لئی ہدایتاں جاری کر دِتیاں گئیاں نیں تے ایس ضمن وچ خلاف ورزی اُتے قانون دے تحت کارروائی کیتی جاوے۔ وزیر اعلا عثمان بزدار نے دھوواں چھڈن والیاں گڈیاں دے خلاف قانون دے تحت کارروائی دا حکم دیندیاں ہویاں کہیا کہ دھوواں چھڈن والیاں گڈیاں دی ویلے سر ٹیوننگ لئی لوکائی وچ شعو ر تے اگاہی پیدا کیتی جاوے۔ اوہناں نے کہیا کہ سموگ نال پیدا ہون والی صورتحال دا جایزا لین لئی خصوصی مانیٹرنگ سیل قایم کیتا گیا اے۔ دوجے پاسے لاہور دا ائر کوالٹی انڈیکس خطرناک حد تک ودھ گیا۔ شہر دا مجموعی طور اُتے ائر کوالٹی انڈیکس 444 ریکارڈ کیتا گیا۔ اپر مال 516، ماڈل ٹاؤن وچ 456 اے کیو آئی پہنچ گیا۔ انار کلی بازار 425، ٹھوکر نیاز بیگ وچ421 ائر کوالٹی انڈیکس ریکارڈ کیتا گیا۔ بحریہ آرچرڈ 404، کینال روڈ وچ 400، فتح گڑھ 399، اقبال ٹاؤن وچ 397، غازی روڈ تے ملحقا علاقیاں وچ اے کیو آئی 394 تک ریکارڈ کیتا گیا۔