لوکائی د،ی بھُکھ نہیں ویکھی جاندی‘ اج غریب دے گھر فاقے نیں: حمزہ شہباز ……٭رویل خبر٭

لاہور (اُچیچا نمایندا) پنجاب اسمبلی وچ قائد حزب اختلاف حمزہ شہباز نے کہیا اے کہ عمران خان نے اپوزیشن توں نہیں قوم توں انتقام لیا‘ ڈسکا ضمنی چوناں اُتے الیکشن کمیشن دی رپورٹ نال دُدھ دا دُدھ تے پانی دا پانی ہو گیا‘ لوکائی دے صبر دا پیمانا لبریز ہو چُکیا‘ اج غریب دے گھر فاقے نیں‘ ہفتا وار مہنگائی دا انڈیکس 15.21 فیصد اے‘ توشا خانا دی تفصیل قوم دے ساہمنے کیوں نہیں رکھدے؟ پہلے اپنے خلاف جہاد کرن فیر ریاست مدینہ دا ناں لین‘ مہنگائی‘ بیروزگاری اُتے ایس حکومت دے خلاف چھٹکارا پان اُتے جدوجہد جاری رکھاں گے۔ عدالت وچ پیشی دے موقع اُتے میڈیا نال گلبات کردیاں ہویاں حمزہ شہباز نے کہیا کہ حکومت چوری شدا مینڈیٹ دی پیداوار اے‘ قوم جان لوے ایس بندے دا دُہرا معیار اے‘ ایہنے لوکائی نُوں جھوٹھے خاب وکھائے سن تے جھوٹھ بولے سن‘ ایہ کھنڈ چوری دے خلاف جہاد کیوں نہیں کردے‘ عمران نیازی پہلے اپنے خلاف جہاد کرن تے ریاست مدینہ دی گل بعد وچ کرن۔ اوہناں نے اپوزیشن توں نہیں لوکائی توں انتقام لیا اے۔ اوہناں نے کہیا کہ ڈینگی ایس قدر کھلر چُکیا اے کہ ہسپتالاں وچ 1‘1 بیڈ اُتے 2`2 روگی پئے نیں‘ ملکی تواریخ وچ مہنگی ترین ایل این جی خریدی گئی‘ ڈالر اسمان نُوں ہتھ لا رہیا اے‘ سردی آئی اے تے گیس دا سخت بحران ساہمنے آن والا اے۔ اوہناں نے کہیا کہ اسیں لَک بنھ لیا اے‘ ساڈے توں ہُن لوکائی دی بھُکھ نہیں ویکھی جاندی‘ اج غریب دے گھر فاقے نیں‘ ساریاں سیاسی جماعتاں تے سول سوسائٹی دا فرض ا ے کہ ایہدے خلاف اُٹھ کھولن۔ اوہناں نے کہیا کہ مسلم لیگ (ن) دے دور وچ پٹرول 11 ڈالر فی بیرل سی پر اسیں قیمت 107 رُپئے فی لیٹر رکھی سی‘ ایہ قوم نال جھوٹھ بولدے نیں پر حقایق نُوں جھٹلایا نہیں جا سکدا۔ اوہناں نے کہیا کہ عمران نیازی توشا خانا کیس وچ جواب کیوں نہیں دیندے‘ فارن فنڈنگ کیس 6 ورھیاں توں التوا دا شکار اے‘ سستا موٹروے بنان دا دعوا وی ایہناں دا اِک ہور جھوٹھ اے‘ ساڈی جماعت نے ہُن ٹھان لئی اے کہ اسیں مہنگائی‘ بیروزگاری‘ اُتے ایس حکومت دے خلاف چھٹکارا پان اُتے جدوجہد جار ی رکھاں گے‘ ایس بندے نے پورے پاکستان نُوں اپنے جھوٹھ تے نا اہلی تے کرپشن نال آلودا کر دِتا اے‘ ایہ مافیا نُوں کابینا وچ اپنے نال بٹھاندے نیں‘ نواں پاکستان مہنگائی دے بھار تھلے نَپیا گیا اے‘ ایس لئی لوک پرانے پاکستان نُوں یاد کر رہے نیں‘ بھارت وچ مہنگائی گھٹ جد کہ پاکستان وچ 15 فیصد اُتے اپڑ چکی اے۔