kraamaat@gmail.com
+ +92 333-430-6384


سموگ اُتے قابو پان توں متعلق درخاست اُتے فیصلا،نجی اداریاں نوں 50 فیصد ملازماں نوں گھر توں کم کرن دا حکم: لاہور ہائی کورٹ ……٭رویل خبر٭


نمائندا رویل November 19, 2021


لاہور (نمایندا رویل) لاہور ہائی کورٹ نے سموگ اُتے قابو پان توں متعلق درخاست اُتے فیصلا سناندیاں ہویاں نجی اداریاں دے 50 فیصد ملازماں نوں گھرتوں کم کرن دا حکم دے دِتا۔ لاہور ہائی کورٹ وچ جسٹس شاہد کریم نے شہری فاروق دی درخاست اُتے سنوائی کیتی۔ درخاست گزار ولوں شیراز ذکا ایڈووکیٹ پیش ہوئے۔ فاضل عدالت نے نجی اداریاں دے 50 فیصد ملازماں نوں گھر توں کم کرن دا حکم دیندیاں ہویاں کہیا کہ ایس سلسلے وچ پنجاب حکومت فوری طور تے نوٹیفیکیشن جاری کرے۔ جسٹس شاہد کریم نے ریمارکس دِتے کہ لاہور‘ گوجرانوالا سنے ہور ضلعیاں توں متعلق روزانا دی بنیاد اُتے میٹنگ کیتی جاوے تے سموگ اُتے قابو پان لئی ہر ممکن اقدامات کیتے جان۔ سنوائی دوران ڈایریکٹر جنرل محکما ماحولیات علی اعجاز سنے ہور افسر وی عدالت وچ موجود سن۔ فوکل پرسن سید کمال حیدر نے جوڈیشل واٹر کمیشن ولوں 5 صفحیاں اُتے مشتمل رپورٹ وی عدالت وچ پیش کیتی۔ ہائیکورٹ وچ جوڈیشل واٹر مالیاتی کمیشن ولوں سکول بند کرن دی سفارش کیتی گئی پر ہائی کورٹ نے تعلیمی ادارے بند کرن دی تجویز اُتے اتفاق نہیں کیتا۔ ہائی کورٹ وچ سموگ ایمرجنسی پلین پیش کر دِتا گیا جد کہ عدالت نے ٹریفک پلین طلب کر لیا۔ عدالت نے ٹریفک ایمرجنسی لاین قایم کرن دا حکم دے دِتا۔ جسٹس شاہد کریم نے ریمارکس دِتے کہ ٹریفک ایمرجنسی لئی کالنگ لاین قایم کیتی جاوے تاں جے ایمرجنسی نمبر اُتے شدید ٹریفک جام دی شکایت کیتی جا سکے۔ دوجے پاسے پنجاب وچ فضائی الودگی دا زور برقرار اے۔ لاہور وچ سموگ نے ڈیرے پا لئے‘ شہر دا ایئر کوالٹی انڈیکس مجموعی طور تے 367 اُتے پہنچ گیا۔ شہری اکھاں تے ساہ دیاں بیماریاں وچ مبتلا ہو گئے۔ لاہور دے علاقے کوٹ لکھپت وچ ایئر کوالٹی انڈیکس 563‘ گلبرگ وچ 564‘ ڈیوس روڈ وچ 513 ریکارڈ کیتا گیا۔ ڈی ایچ اے فیز 2 وچ 487‘ ٹاؤن شپ وچ 465‘ بحریا آرچرڈ وچ 413‘ علاما اقبال ٹاؤن وچ 422‘ پنجاب یونیورسٹی وچ 475‘ ایڈن کاٹیجز 406‘ انار کلی بازار وچ 416 اے کیو آئی ریکارڈ کیتا گیا۔ محکما موسمیات مطابق شہر وچ بارش دا کوئی امکان نہیں۔ شہر دا گھٹ توں گھٹ درجا حرارت 13 ڈگری سینٹی گریڈ ریکارڈ کیتا گیا۔ موجودا درجا حرارت 17 ڈگری تک جا پہنچیا جد کہ درجا حرارت 28 ڈگری تک جان دا امکان اے۔ ہوا وچ نمی دا تناسب 64 سینٹی گریڈ ریکارڈ کیتا گیا۔