کابینا دی توانائی کمیٹی نے سردیاں لئی گیس لوڈ مینجمنٹ منصوبے دی منظوری دے دِتی ……٭رویل خبر٭

اسلام آباد (نیوز ڈیسک) کابینا دی توانائی کمیٹی نے سردیاں لئی گیس لوڈ مینجمنٹ پلین دی منظوری دے دِتی۔ سردیاں وچ گھریلو ورتینڈراں نوں گیس دی سپلائی یقینی بنان دی ہدایت کیتی گئی اے۔ جنرل انڈسٹری تے سی این جی سیکٹر نوں 2 مہینے لئی گیس فراہمی بند کرن دی تجویز دی وی منظوری ساہمنے آئی اے۔ تفصیلات مطابق وفاقی وزیر منصوبا بندی اسد عمر دی صدارت ہیٹھ کابینا دی توانائی کمیٹی دے اجلاس وچ گیس لوڈ مینجمنٹ پلین دی منظوری دِتی گئی۔ کمیٹی نے ایکسپورٹ توں وکھ جنرل انڈسٹری تے سی این جی سیکٹر نوں گیس دی سپلائی 2 مہینے لئی بند کرن دی تجویز منظور کر لئی۔ کمیٹی نوں بریفنگ وچ دسیا گیا کہ چالو ورھے دسمبر وچ 592 ایم ایم سی ایف ڈی گیس دی کمی دا تخمینا اے جہڑا جنوری 2022 وچ ودھ کے772 ایم ایم سی ایف ڈی ہو جاوے گا۔ کمیٹی نوں دسیا گیا کہ سوئی ناردرن دی 3 مہینے لئی 92 ارب رُپئے توں ودھ دی ایل این جی تے دسمبر وچ 361ایم ایم سی ایف ڈی ایل این جی گھریلو تے کمرشل شعبے نوں منتقل کیتی جاوے گی۔ ایسے طرحاں جنوری وچ 575 ایم ایم سی ایف ڈی ایل این جی تے فروری وچ 332 ایم ایم سی ایف ڈی ایل این جی گھریلو تے کمرشل شعبے نوں منتقل کیتا جاوے گا۔ کمیٹی نے سردیاں وچ گھریلو ورتینڈراں نوں گیس دی سپلائی یقینی بنان دی ہدایت کر دِتی۔ وفاقی کابینا توانائی کمیٹی دے فیصلیاں دی توثیق کرے گی۔