شہباز شریف فیملی منی لانڈرنگ سکینڈل کیس،نیب رپورٹ وچ گرفتار ملزم علی احمد خان بارے اہم انکشاف ……٭رویل خبر٭

لاہور (نمایندا رویل) قومی احتساب بیورو (نیب) لاہور نے شہباز شریف فیملی منی لانڈرنگ سکینڈل وچ گرفتار ملزم علی احمد خان توں متعلق دسیا اے کہ ملزم نے شہباز شریف خاندان لئی منی لانڈرنگ وچ سہولت کاری کیتی۔ نیب دیاں تحقیقات توں متعلق رپورٹ وچ کہیا گیا اے کہ ملزم علی احمد خان نے شہباز شریف فیملی لئی منی لانڈرنگ وچ مدد تے اعانت کیتی۔ ملزم نے منی لانڈرنگ وچ نہ صرف مدد کیتی سگوں سہولت کاری وی کیتی۔نیب رپورٹ وچ دعوا کیتا گیا اے کہ ملزم علی احمد خان شہباز شریف دا بے نامی دار وی اے تے 2002 توں 2018 تک ڈی جی پی آر تے وزیراعلا ہاؤس وچ ملازم رہیا۔ رپورٹ مطابق شہباز شریف نے ملزم دی بھرتی لئی رولز وچ نرمی وی کیتی جد کہ ملازمت دوران ملزم نے 2 بے نامی کمپنیاں دی تشکیل وچ مدد تے سہولت کاری کیتی۔ 2 کمپنیاں گڈ نیچر تے یونی ٹاس راہیں 1884 ملین توں ودھ دی منی لانڈرنگ کیتی گئی۔ نیب رپورٹ وچ دسیا گیا اے کہ ملزم علی احمد خان نے کمپنیاں وچ سرمایا کاری لئی بیرون ملک توں 41 ملین توں ودھ دیاں ترسیلات وصول کیتیاں۔ رپورٹ وچ کہیا گیا اے کہ ایف بی آر دے ریکارڈ مطابق 2016 وچ ملزم دے کل اثاثیاں دی مالیت لگ بھگ ڈیڈھ ملین سی جد کہ بیرون ملک توں آن والیاں ترسیلات توں ملزم دے اثاثیاں دی مالیت 43 ملین توں ودھ ہو گئی۔