ثاقب نثار نے نواز شریف‘ مریم نواز نوں سزاواں دوائیاں‘ گھٹو گھٹ ہُن تے سزا ختم کر دیو: شاہد خاقان عباسی ……٭رویل خبر٭

اسلام آباد (نیوز ڈیسک) مسلم لیگ (ن) دے سینئر آگو تے پچھلے وزیراعظم شاہد خاقان عباسی نے پچھلے چیف جسٹس ثاقب نثار دی مبینا آڈیو دا فرانزک کران دا مطالبا کردیاں ہویاں کہیا اے کہ پچھلے چیف جسٹس (ر) ثاقب نثار نے حکم کہنوں دِتا کجھ پتا نہیں‘ تسیں فرانزک کرواؤ پر سانوں انصاف چاہیدا اے۔ ثاقب نثار نے نواز شریف‘ مریم نواز نوں سزاواں دوائیاں‘ گھٹو گھٹ ہُن تے سزا ختم کر دیو۔ اسلام آباد دی احتساب عدالت وچ میڈیا نال گل بات کردیاں ہویاں شاہد خاقان نے کہیا کہ کوئی ایہ نہیں کہ سکدا کہ اوہ اواز پچھلے چیف جسٹس دی نہیں‘ جے اسیں حلف ناما یاں آڈیو بنائی اے تے بلکل سزا دیو‘ جے حلف نامے وچ کیتی گئی گل صحیح اے تے ثاقب نثار نوں سزا دیو‘ جے غلط اے تے رانا شمیم نوں سزا دیو۔ اوہناں نے کہیا کہ حکومت اپنا رشتا آڈیو نال قایم کرنا چاہندی اے‘ آڈیو وچ ملک دا اوس ویلے دا چیف جسٹس کہ رہیا کہ اوہناں نوں حکم اے کہ نواز شریف‘ مریم نواز نوں سزا دینی اے۔ پچھلے چیف جسٹس نے حکم کہنوں دِتا کجھ پتا نہیں‘ تسیں فرانزک کرواؤ پر سانوں انصاف چاہیدا اے۔ ہُن انصاف لئی کہدے کول جاواں گا؟اک حکم تے سازش دے تحت نواز شریف تے مریم نواز نوں سزا دوائی گئی۔ حکومت فرانزک سنے جو مرضی کروا لووے حقیقت ایہو اے کہ اواز پچھلے چیف جسٹس دی اے۔ ثاقب نثار نوں بلا کے پچھیا جاوے کہ اوہناں نے ایہ گل کیتی اے یاں نہیں۔ حکومت دے وزیر تے کرائے دے ترجمان پریس کانفرنس کردے رہن گے۔ پچھلے وزیراعظم دا کہنا سی کہ ہر ادارے نوں اپنیاں آئینی حداں وچ رہ کے کم کرنا چاہیدا اے۔ معاملات عدالت وچ آئین مطابق ہونے چاہیدے نیں تے معاملات سفارشاں اُتے نہیں ہونے چاہیدے۔ اوہناں نے ہور کہیا کہ ملک وچ عدل دے نظام نال جو کجھ ہو رہیا اے اوہ ساریاں ساہمنے اے‘ بیان حلفی تے آڈیو دی تہ تک پہنچن دی ضرورت اے ایہدے وچ آن والیاں گلاں خطرناک نیں۔ لیگی آگو دا کہنا سی کہ چیف جسٹس دا معاملا آوے گا تے سوموٹو نوٹس لینا چاہیدا اے‘ آڈیو دے معاملے دی تصدیق کرانی چاہیدی اے۔ اوہناں نے کہیا کہ نیب آرڈیننس ہونا ای نہیں چاہیدا سی تے حکومت غلط آرڈیننس لے کے آئی اے‘ چیئرمین نیب نوں بلیک میل کیتا جا رہیا اے۔اج تک کوئی پتا نہیں چلیا کہ نیب نے کیہ فایدا دِتا۔ نویں نیب آرڈیننس اُتے اج تک کوئی عدالت فیصلا نہیں کر سکی کہ ایس آرڈیننس دا کیہ اثر اے۔ ملک دے معاملات وگاڑن وچ نیب دا وڈا ہتھ اے۔ نیب کولوں پچھیا جانا چاہیدا اے کہ کنے سیاستداناں نوں تفتیش وچ شامل کیتا اے تے کنی رقم وصول کیتی اے۔ حکومت دی کرپشن ملک دے ساہمنے اے۔ نیب دے بنن توں پہلے پاکستانی شہری دی آمدن بنگلا دیشن تے انڈیا توں زیادا سی۔ جنی مہنگائی پاکستان وچ دنیا وچ نہیں اے۔ پاکستان وچ مہنگائی نوں ختم کرن دا طریقا آئین اُتے عمل پیرا ہونا اے۔ جے کلبھوشن نوں چھڈنا سی تے آڑڈیننس دے آندے اسمبلی وچ بل کیوں لیائے۔