kraamaat@gmail.com
+ +92 333-430-6384


سموگ لئی اقدامات نہ کرن تے مکمل لاک ڈاؤن دی بینتی،لاہور ہائیکورٹ ولوں آلودگی دا کارن بنن والیاں فیکٹریاں سیل کرن دا حکم ……٭رویل خبر٭


نمائندا رویل November 24, 2021


لاہور (نمایندا رویل) لاہور ہائی کورٹ دے جسٹس شاہد کریم نے سکولاں نوں اک ہفتے تک بند رکھن دی استدعا رد کردیاں ہویاں الودگی دا کارن بندن والیاں فیکٹریاں نوں سیل کرن دا حکم دے دِتا۔ لاہور ہائی کورٹ دے جسٹس شاہد کریم نے شیراز ذکا‘ آفتاب ورک تے ابوذر سلمان خان نیازی دیاں درخاستاں اُتے سنوائی کیتی‘ جہدے وچ سموگ لئی اقدامات نہ کرن تے مکمل لاک ڈاؤن دی استدعا کیتی گئی۔ عدالتی حکم اُتے میئر لاہور کرنل ریٹایرڈ مبشر جاوید پیش ہوئے۔ میئر لاہور نے پنجاب حکومت دی شکایت کیتی کہ اوہناں نوں صرف 8 فیصد بجٹ استعمال کرن دی اجازت اے تے مکمل اختیارات نہیں دِتے جا رہے۔ عدالت نے کہیا کہ اگے الیکشن آ رہے نیں‘ تسیں لاہور دی خدمت کرو۔ جسٹس شاہد کریم نے میئر لاہور نوں فوکل پرسن مقرر کرن دا وی حکم دے دِتا۔ جسٹس شاہد کریم نے ریمارکس دِتے کہ لاہور نوں اِنج ای صاف کرنا اے جویں ساڈا گھر ہوندا اے۔